Йиз ляхнин тажрубайиъ гьарсар спортсмендихъди вуйи сюгьбатнаъ дурари аргъаж шулайи наслиз тувру теклифарикан гьерхруган, сабпи нубатнаъди аьгъювалар гъадагъуваликан ва кьюбпибди – спортдиин машгъул хьуваликан кIури шулу. Гьациб жаваб Малик Юзбеговдира тувнийи.
Маликди Мягьячгъала шагьриъ мектеб, хъасин Таможняйин академия ккудубкIну. Дугъан абйир-бабар Мягьячгъала шагьриз Хив райондин ЦIийи ЗахитI гъул’ан кючмиш гъахьидар вуйи. Малик спортдин ушу-саньда, таиландин бокс ва шубуб ражари кикбоксинг жюрйириан вари дюн’яйин чемпион гъахьну. Улихьнаси Санкт-Петербургдиъ думу Валентина Матвиенкойи кьабул гъапIну, кьандиси Урусатдин ужударсдар спортсменар къаршуламиш апIру серенжемдиъ РФ-дин спортдин Министерствойиъ пешкешар ва гьюрматнан грамотйир тувбиинди лишанлу гъапIнийи. Малик Юзбегов вари халкьарин классдин спортдин мастер, лайикьлу тренер ву.
Гьамусяаьт Малик чан хал-хизандихъди Санкт-Петербург шагьриъ яшамиш шула. Улихьнаси дугъаз багарихьди Хорватияйиъ кIули гъягъру ММА-йан вуйи вари дюн’яйин талитариъ иштирак хьуз теклиф гъафну. Малик талитарихьна гьязур шула ва, гьаддихъди сабси, дугъу Санкт-Петербург шагьриъ спортдин заан устадвалин мектебдиъ жигьилар пишекарвалин кчIихбарихьна гьязур апIура.
«Узу хайлин талитариъ, турнирариъ, чемпионатариъ иштирак гъахьунза. Спортдиин машгъул вуйи фунур касдизра гъалибваларси, магълуб шлу дюшюшарра алахьуру. Йиз яш 7 йис гъабхьиган, адашди узу Гьяжи Мягьячевдин ччвурнахъ хъайи спортдин мектебдиз хъади гъафнийи. Гьадму йисхъан мина спортдиин машгъул вуза. Сарпи тренерикан гизаф далилар асиллу шулу, гьадму гьисабнаан спортдин гележегдин рякъра. Йиз сарпи тренер Фарид Аьгьмедовдиз баяр спортдиина машгъул апIуз аьгъяйи. Дугъу туву дарсариинди узу гъи йиз хиликк ккайи жигьилар, бицIидар тербияламиш апIураза. Гьаддихъди сабси, аьгъювалариз фикир тувну ккунду. Гьарсаб алдабгъру гам, кIуру гаф, апIру ляхин фикир тувну тамам апIуруш, натижа ужуб шулу. Уьмрин дюз рякъюъ айи инсан улдугуб мумкин дар», – гъапну Малик Юзбеговди.
Маликдин, вари дагълу жиларинси, хизан, хизандин аьдатар уьрхювал, дустариз гьюрмат апIувал сабпи йишв’ин ал. Дугъу чан ккуни Лианайихъди мюгькам хизан арайиз дубхна. Дурариз шубур велед а – кьюр бай ва сар риш. Кми-кмиди Санкт-Петербургдиз Урусатдин машгьур спортсменариз теклиф апIури, Маликди спортдин мектебариъ жигьиларихъди мастер-классар ва жара серенжемар гъахувалра аьдатнаъ ипна.
Ич терефнаан Малик Юзбеговдиз багарихьди шлу талитариъра хъуркьувалар ккун апIурача. Гъит, гьамусдихъан тина вуйи зенгар Маликдин гъалибваликан хабар туврудар ишри.
