Пулин цIа

 

Сар хпириз гьарган папрус зигру жилир ади шулу. Жилири кми-кмиди хпирихьан папрусиз пул ккун апIури гъахьну. Хпирира гьар ражари жилириз тувубсиб пулин кьадар чемодандиъра ипри гъахьну…
Хайлин вахтар гъягъюру, дурар кьаби шулу. Ярквраз душну гакIвлар хуз даршулайи гьялнахъна гъафиган, жилири хпириз кIуру:
– КкунийкIан саб ражарикьан пичраъ цIаъ ипну, йиз кьаби кIурбар мани апIуз!
– Фу кIуру гаф вуяв, жилир. Саб ражну узу яв кIурбар мани апIарза, – дупну, хпири чемодандиъ айи вари пулар пичразди гатIахьуру ва дурарик цIа кипру. Хъасин, тяжуб духьнайи жилирин машназ лигури, аьлхъюру:
– Уву ярхи уьмриъ гъубгубсиб пул узу саб дакьикьайиъ гъубгунза, жилир.

 

Хпирин хъял

 

Хюрикк гъулаъ тазади фельдшерди лихурайи Агьмеддиз Пилигъна аьхю яшарин аьзарлуйихьна дих гъапIнийи. Агьмед санитаркара хъади аьзарлуйин хуларин икриъ учIвруган, айвандикк, дурариз ккилигури, жигьил дишагьли дийигънайи.
– Гагайин гьял фициб ву? – гьерхнийи фельдшери дишагьлийихьан, амма дугъу, маш дибгъну, жаваб тувундайи.
Аьзарлуйиз дилигну, дугъаз лазим вуйи дармнар ва насигьятар тувну, умбрариан исизди удучIвурайи фельдшериз жигьил дишагьлийи гъапнийи:
– Эгер учухьна тазади дуфнайир дайиш, кьусум йивну, гьаму умбрариан исина идипуйзаву.
Русвагь гъахьи фельдшери, икриан удучIвган, санитаркайихьан гьерху:
– Чухсагъулин ерина му дишагьлийи узуз гьамцдар гафар гьаз гъапнийи?
– Думу дишагьли гьадму кьабирин уьмрин дуст ву, девлет хъа кIури, дугъаз хпирди дуфнайир ву, – аьлхъюру санитарка.