Ноябрин вазлин 15-22-пи йигъари Астрахань шагьриъ Астрахандин областдин шашкйирин Федерацияйин, армянарин культурайин региондин АРЕВ жямяаьтлугъ тешкилатдин теклифниинди, дявдин игит Месропа Дадашьяндин рюгьназ бахш дапIну, урус шашкйириан Урусатдин 11-пи турнир кIули гъубшну.

 

Турнириъ Урусатдин 8 региондиан 30-кас иштирак гъахьну. Дагъустан Республикайиан думу турнириъ Каспийск шагьриан вуйи Батырай Зулпикаров ва Табасаран райондиан Исмяил Исмяилов иштирак гъахьну. Турнирин иштиракчйир яшнан кьюб дестейиз пай гъапIнийи – 50-йис хьайиз вуйидар ва 50 йистIан артьухъ яш айидар. Чпин яш 50 йистIан цIиб вуйи касарин арайиъ сабпи йишв Чечен Республикайиан Минкаил Исраиловди гъадабгъну, кьюбпи йишв Ростов областдин вакил Виталий Гильди, хъа шубубпи йишван сагьиб Сизран шагьрин агьали Анатолий Коломейцев гъахьну. 50 йистIан артухъ яш айи касарин арайиъ сабпи йишв Табасаран райондиан вуйи Исмяил Исмяиловди гъадабгъну, кьюбпи йишв – Ставрополиан вуйи Владимир Губаренкойи, шубубпи йишв – Каспийск шагьрин агьали Батырай Зулпикаровди. Шубарин арайиъ Астрахандиан вуйи Мария Звадай гъалиб гъахьну.

 

Гъалиб гъахьу вари касар кубокар, грамотйир ва медалар тувбиинди лишанламиш гъапIну. Гьацира мялум апIуз ккундучузки, 2019-пи йисан 1-пи декабриъ Дербент шагьрин гъвалахъ хъайи Чайка кIуру турбазайиъ урус шашк-йирин Дагъустандин ачмиш вуйи кубокдин 3-пи этап кIули гъябгъиди.