2019-пи йисан октябрь вазлин 1-пи йигълан мина 31-пи декабиризкьан Дербент, Дагъ. Огни шагьрарин ва Дербент райондин призывникар РФ-дин Яракьлу Кьувватариз гъуллугъназ гъадагъбан чвлин призыв ккебгъна.
Гъубшу гьяфтайиъ Дербент шагьриъ айи призывной пунктдиъ баяр эскервалин гъуллугъназ армияйиз гъахуз гьязур апIру йишван отделин начальник Фарид Мусаевдихъди сюгьбат гъубхнийза.
Фарид Абусатовичди призывникар Яракьлу Кьувватариз гъахуз фици гьязур апIураш ва му гьяракатнахъди аьлакьалу вуди къанундиъ тIаънайи дигиш’валарихъдира таниш гъапIнийзу. «Му призывдиъ 1992-пи йисхъан мина вуйи йисари бабкан гъахьи ва заан образование айи, кьюр бицIир хъайи агьалйир сабпи нубатнаъ эскервалин гъуллугъназ гьаъди. 2019-пи йисандин чвлин призывдиз 300 призывникар уч гъахьну. Жюрбежюр себебар агури, армияйиъ гъуллугъ апIбаккан кIул ккадабгъуз ккунидарра шулу. Дицисдар касар агбаъ РОВД-йин, ГОВД-йин гъуллугъчйири кюмек апIуру. Федералин къанундиз асас вуди, призывдин яшнаъ айи агьалйир медицинайин комиссияйин ахтармишариз гъюз буржлу ву. Улупнайи вахтна гьарсар призывник медицинайин комиссияйиз гъювал чарасуз лазим ву».
Фарид Мусаевдин гафариинди, призывдин кампанияйиъ иштирак хьуз призывникарин абйир-бабариз, Ватандин Аьхю дявдин ветеранариз, афгъан ва чечен дявйирин гьяракатариъ иштирак гъахьидариз, Дербент шагьрин администрацияйин ва жямяаьтлугъдин вакилариз теклиф апIура.
Му ляхин тешкил апIуз Дербентдин администрацияйи, шагьрин образованиейин ва культурайин управлениейи, администрацияйин жигьиларихъди ляхин гъабхру отдели, Дербент райондин ветеранарин Советди аьхю кюмек тувра.
«Призывникар уголовный тахсиркарвалар гъапIдар вуш, наркотикар ишлетмиш апIбиин, ички убхъбиин машгъул вуш аьгъю апIури, РОВД-йиз ва ГОВД-йиз, сагъламвал уьбхбан идарйириз илтIикIну, дурарин гьякьнаан мялуматар гъадагъувал лазим ву. Ихь баярин гьякьнаан гьацдар мялуматар республикайин сагъламвал уьбхбан идарйирианра гъадагъуру. Армияйиз гъягъюз ккунидар гизаф айивализ лигну, сабпи нубатнаъ армияйиз гьауз гъудубкьу сагъ’вал хъайи, заан образование айи, автошкола ккудубкIу ва тахсиркарвалар дарапIу жигьилар гъядягъюра. Хил алдабгъуз шлу себебар адарди армияйиъ гъуллугъ апIбаккан кIул ккадабгъурайи ватандашар, РФ-дин Уголовный кодексдин 328-пи маддайиз асас вуди, жавабдарвалихьна зигиди. Дербент, Дагъ. Огни шагьрариан ва Дербент райиондиан вуйи вари призывникари цци айтIан кьушмариъ гъуллугъ апIиди», – ктибтнийи дугъу.
Призывникар армияйиз гъадагъбан ляхниъ Дербент райондин гъуларин администрацйири ва Дербент, Дагъ. Огни шагьрарин вакиларира аьхю роль уйнамиш апIура. Дурари варидари, му ляхин къанундин тIалабариз жаваб тувруси гъабхбаз артухъ фикир тувра.
