Ноябрин 27-диъ «Дагъустан» РИА-йин конференцйир гъахру залиъ РД-йин экономикайинна аьтрафарин артмиш’валин министр Гьяжи Султановдихъди республикайин Главайинна уьлкейин Президентдин гюрюшдин натижйириз бахш дапIнайи пресс-конференция гъабхьну.

 

Конференция ачмиш апIури, министри мялум гъапIганси, республикайин Главайи РФ-дин Президентдихъди ди асас вуди рякъярикан, промышленностдикан, экономикайин артмиш’валикан ва йисандин арайиъ гъапIу ляхнарин натижйирикан сюгьбат гъубхну. «Мялум вуйиганси, гьамусяаьт ужуди ляхин апIурайи регионариз тувуз кIури, 50 миллиард манат жара дапIна. Гъубшу йисан ихь республикайи 625 миллион манатдин грант гъадабгъну. Ццира грант гъадабгъбак умуд киврача», – гъапну дугъу.

 

Дагълу районарин артмиш’валикан улхури, министри нумуна вуди Табасаран район гъадабгънийи. Дугъу мялум гъапIганси, аьхиримжи вахтна райондиз шагьрариан 6 хизан хъадакну гъафну. Гьамура райондин экономикайин артмиш’вал ву. Дугъан гафариинди, инженервалин ужуб инфраструктура адарш, гьич саб йишвра артмиш шулдар. Гьаддиз районарин экономика артмиш апIбиин сабпи нубатнаъди душваъ дуланмиш шулайи ватанагьлийир чалишмиш духьну ккунду.

 

«Цци республикайин инвестицйиирин программа шубуб ражари артухъ гъабхьну. Гьамусяаьтна республикайин Главайин жягьтлувалиинди «Йиз Дагъустан – йиз шид», «Йиз Дагъустан – шагьринсдар гъулайвалар айи бушлугъ» ва «Йиз Дагъустан – йиз рякъяр» региондин проектар уьмриз кечирмиш апIура. Му проектар шагьрариъси, гъулариъра кIулиз адагъурайидар ву» – къайд гъапIну министри.