2019-пи йисан 24-пи ноябриъ Хив райондин Ляхла гъулаъ спортдин цIийи жямяаьтлугъ майдан ачмиш гъапIну. Ляхла гъулан агьалйири му шадвалин мярака ачмиш апIуз лап дикъатлуди гьязурлугъар духнайи. Дурари чпин гъул’ан вуйи ва жюрбежюр йишвариъ яшамиш шулайи гъуландариз теклифар дапIнайи.
Му майдан Урусатдин Президентдин грантдин гъалибчи, «БицIи бюджетдин спортдин майдан» проектдин автор, Табасаран райондин РССМ-дин руководитель Мягьямед Гьясратялиевдин кIубанвалиинди ва гъулан жямяаьтдин кюмекниинди саб бицIи вахтнан арайиъ тикмиш гъапIну.
Му шадлугънан серенжемдиъ жюрбежюр жара йишварианра, гъуллугъарианра дуфнайи хайлин хялар иштирак гъахьнийи, дурарикан сар – Дагъустандин сагъламвал уьбхбан Министерствойин РМИАЦ-дин директор Эдуард Мустафаев вуйи. Дугъу чан жикъи улхбаъ Ляхла гъулан жямяаьт цIийи майдан абццбахъди тебрик гъапIнийи ва думу гъулан жигьилариз спортдин рякъюъ аьхю хъуркьувалар хьуб ккун гъапIнийи.
Му шадлугънан серенжемдиъ республикайин гъулан мяишатдин ва итIру сурсатарин Министерствойин мялуматаринна автоматламиш дапIнайи гъурулушдин управлениейин начальник Азим Аьбдулагъаевра иштирак гъахьнийи. «Гьамциб ляхнихьна жара гъулариъра маракьлувал улупурайивали ихь жигьилариз кIваантIан спортдиин машгъул хьуз ккуниваликан кIура.
Дурариз кюмек тувну ккунду», – къайд гъапIнийи дугъу чан улхбаъ.
«ВаритIан лазим вуйи рякъ – «БицIи бюджетдин спортдин майдан» кIуру проект ихь уьмриъ сагъламвал артмиш апIуз диш дапIнайиб ву. Ляхла гъулаъ мициб ужуб серенжем къайд апIувал му гъулан советдин кIубанвалиинди арайиз гъафиб ву, гьацира дидиъ гъулан жямяаьтдира аьхю иштирак’вал гъапIну. Му серенжемдиъ, учвузси, вари Табасаран райондизра аьхю мяна а. Ичв кIубанвал жара гъуларизра рябкъиди. «БицIи бюджетдин спортдин майдан» кIуру проект Табасаран райондиъ либхура ва диди ужудар хъуркьуваларра улупура», – гъапну Мягьямед Гьясратялиевди.
Ляхла гъулан агьалйир цIийи майдан ачмиш апIбахъди тебрик апIури, «Ляхла гъулан совет» СП-йин глава Шамиль Гьяжимурадовди му майдан Табасаран райондин РССМ-дин руководитель Мягьямед Аьбдуллаевич кIули ади тикмиш гъапIуваликан гъапну. Дугъу спортдин талитар кIули гъахувал улихь гъягъювалик Мягьямед Гьясратялиевди аьхю пай кивуваликан, му майдан сагъламвал уьбхюз ва мюгькам апIуз аьхю уьмарат вуйиваликан гъапнийи, чан улхбан аьхириъ дугъу варидариз аьхю хъуркьувалар, спортдин жюрбежюр серенжемариъ иштирак духьну, гъалибвалар гъадагъувал ккун гъапIнийи.
Культурайин хулан гъуллугъчйирира концертдин аьхю программа гьязур дапIнайи.
Хъасин серенжемдин асас гьядиса – уьру лента гьадабтIувал гъабхьнийи. Думу гьюрматлу ляхин Шамиль Гьяжимурадовди, Эдуард Мустафаевди ва Мягьямед Гьясратялиевди кIулиз адабгънийи.
Спортдин майдан ачмиш апIбахъди аьлакьалу вуди, Ляхлаарин, Ургъарин ва Фурдугъарин гъуларин командйирин арайиъ мини-футболиан турнир кIули гъубшнийи. Талитариъ сабпи йишв Ургъарин гъулан командайи гъибиснийи, кьюбпи йишван сагьиб Ляхла гъулан команда гъабхьнийи, хъа шубубпи йишв Фурдагъ гъулан командайи гъазанмиш гъапIнийи. Турнириъ гъалибвалин йишвар гъадагъу командйириз кубокар, медалар ва грамотйир тувнийи.
