Ноябрин 6-диан 24-дизкьан «Табасарандин нурар» газатдин Инстаграм социалин сетдин официалин страницайиъ дадайин Йигъаз бахш вуди тешкил дапIнайи конкурс кIули гъубшну. Конкурсдиъ жа-жара яшарин 27 касди иштирак’вал гъапIнийи.
Конкурсдиъ иштирак хьпан бадали улупнайи асас шартIар гьамцдар вуйи: жвуван дада дадайин Йигъахъди тебрик апIури, саб дакьикьайиъ видеоролик адабгъну, думу учухьна хътапIувал; тебрик апIувал анжагъ табасаран чIалниинди дубхьну ккундийи. Хъасин аьхириъ гъалибчи гьарсаб видеороликдиз инсанари диву лайкарин, яна гьадрари туву сесерин кьадарназ лигну, тяйин апIувал.
Конкурсдиъ иштирак гъахьи вари 27 касди улупнайи шартIарин къайда гъюбхнийи. Конкурс 24-пи ноябризтIан давам гъабхьундаршра, дидин иштиракчйириз инсанари чпин сесер тувбан мумкинвал нояб-рин 30-пи йигъазкьан тувнийча. Ноябрин аьхириъ конкурсдин натижйир гъивунча.
Конкурс тешкил апIруган, яна эвелиан учу дупнайиганси, конкурс-диъ гъалибвалин 1-пи, 2-пи ва 3-пи йишвар гъахьидар ич Инстаграмдин подписчикари гъядягънийи, хъа сабсана пешкешнан йишв, редакцияйин коллективдин сатIи вуйи йикьрариинди тувнийи.
Гьаму жюрейиинди натиж-йир йивну, 1140 касдиз видеоролик кьабул хьпаз лигну, сабпи йишв чан яш 3 йис вуйи Хючнаарин «Юлдаш» МКОУ ЦО-йин бицIидарин багъдиз гъягъю-райи Фатима Мирзахановайиз тувну. Кьюбпи йшиван сагьиб гъахьир Чечен Республикайин Грозный шагьриъ яшамиш шулайи ихь ватанагьли, 9 йисандин яшариъ айи риш Самира Сефиханова ву. Дугъан, дадайиз тебрик апIури, шиир урхбан видеоролик 813 касдиз кьабул гъабхьну. Инсанариз кьабул хьпиинди тяйин дапIну, шубубпи йишван сагьиб гъахьир Ягъдигъарин 1-пи нумрайин мектебдин 6-пи классдиъ урхурайи Амина Наврузялиева ву. Дугъаз 799 касди чпин сесер тувну. Ич редакцияйин коллективдин йикьрариинди сабсана пешкешнан йишван сагьиб гъахьир студент риш, Гъвандикк гъул’ан вуйи Сабина Гьясратова ву.
Конкурсдиъ гъалиб гъахьи Фатима Мирзахановайиз, Самира Сефихановайиз, Амина Наврузялиевайиз ва Сабина Гьясратовайиз декабрин 10-пи йигъан сяаьт 11-диъ «Табасарандин нурар» газатдин редакцияйиз гъюбан теклиф апIурача. Учвуз ккилигурача!
