Гьаму йигъари РД-йин Халкьдин Собраниейин депутат Нариман Асваров, Хив гъулан М. Шамхаловдин ччвурнахъ хъайи мектебдиъ урхурайдарихъди, мялимарихъди ва райондин агьалйирихъди гюрюшмиш гъахьнийи.
Мектебдиъ кIули гъубшу серенжемдиъ образованиейин методкабинетдиз регьбервал туврайи Наила Агъасиева, Хиварин кьялан мектебдин директор Физули Аьбдулязизов, вари Урусатдин политикайин «Саб вуйи Урусат» партияйин Хив райондин ерли отделениейин жямяаьтлугъ кьабул апIру хулан председатель Инаят Рамазанова, мектебдин мялимар, 9-11-пи классариъ урхурайи баяр-шубар иштирак гъахьний.
Депутатди дурариз, район ва халкь бадали юкIв убгури, чпи алдагъурайи гамарикан, гъабхурайи ляхникан ва улихь дивнайи метлебарикан кьатI’иди ктибтнийи. Гьаму йигъари ихь республикайиъ табасаран студентарин арайиъ гъубшу слётдиканра улхури, Нариман Асваровичди урхурайдариз дициб серенжем тешкил апIбан асас метлеб фу-вуш ашкар гъапIнийи.
Гьацира мялимари ва урхурайдари чпиз лазим вуйи, уч духьнайидариз важиблу суалариан депутатдихъди маракьлу сюгьбат гъубхнийи.
Аьхириъ депутатди урхурайидарикан ГИА-йиан лазим вуйи баллар гъадагъувал, чпиз дарс киврайи мялимарин кIул асккан дарапIруси, ужудар натижйир йивувал, чпи ктабгъурайи пишекарвалин рякъ ягъурлуб хьувал ккун гъапIнийи.
Мидланра савайи, депутат райондин агьалйирихъдира гюрюшмиш гъахьнийи. Думу гюрюшдиъ райондин глава Ярмет Аьлиметович кIулиъ ади райондин администрацияйин терефнаанра вакилар иштирак гъахьнийи. Му йигъан депутатдихьна, чпин дерд гьял апIбан чарйир агури, хьур кас илтIикIнийи.
Cарпирди Ккугъарин гъулаъ диврайи спортзалин гьякьнаан суал хьади Демирбег Эмирбегов илIикIнийи. Спортзалин гьякьнаан вуйи учIру месэла улихьна йигъари райондин глава Ярмет Ярметовдира чан хилиз гъадабгънайи. Му месэлайин гьякьнаан лазим вуйи касарихъди, министрарихъди гаф-чIал дапIну, думу гьял апIуз къарар адабгъна ва РИП-дин Минспортдик кипна.
Хив гъулан глава Фахрудин Рамазанов зирзибил гъабхру тешкилатдин гьякьнаан наразивал улупури илтIикIнийи. Гьелбетда, му суал гьамусяаьт райондин вари гъуларин иццру суал ву. Депутатди му месэла чарасуз вуди республикайин дережайиъ дивруваликан ва гьаму йигъари гьял апIуз чарйир агруваликан къайд гъапIнийи.
ЦIийи Фрюгъярин гъулан глава Зиямудин Таригъулиевди депутатдиз чпин гъулаъ дивнайи трансорматорарихьан лазим вуйи кьадар акв тувуз удудукьрайиваликан ктибтнийи. Му суалнан гьякьнаан депутатди учв Дербент шагьрин РЭС-дин аьхюрихьна илтIикIруваликан ва натижайиъ трансформаторин гъайгъушнаъ шлуваликан субут гъапIнийи.
Зирзибил абхьру бак чан ихтияр адарди чан участокдиин дивну кIури, Лика гъулан агьали Ферузат Абаева депутатдихьна ва райондин администрацияйихьна илтIикIнийи. Гьелбетда, му суал гъулан главайиз дих дапIну гьял апIуз йикьрар гъапIнийи.
Аьхириъ райондин образованиейин начальник Назаряли Тарланов илтIикIнийи. Дугъу чан улхбаъ райондин сасдар гъуларин мектебариъ физикайиан, географияйиан, химияйиан, урус чIалнаан, математика-йиан гьуркIну мялимар адруваликан гъапнийи. Ва гьацира методистариз РМИ-йин РОО-йиан льготйир улулуп-райиваликан ктибтнийи. Депутатди, сифте вуйи суалназ жаваб туври, Н. Тарлановдиз чан теклифар гьязур апIувал ва 2020-пи йисан «Земский мялим» программайиъ думу теклифар атIагуз кюмек тувувал субут гъапIнийи. Хъа кьюбпи суал РД-йин Халкьдин Собраниейин совещаниейиъ дивбакан гъапнийи, эгер льготйир лайикь вуш, натижайиъ суал гьял апIуваликан къайд гъапIнийи.
Халкьдин депутат Нариман Асваровдихъди гъапIу хайирлу гафар-чIалар ляхнариз илтIикIур дупну, умуд кивурхьа.
