Гьаму йигъари РД-йин Правительствойин вице-премьер – республикайин образованиейинна илимдин министр Уммупазиль Уьмаровайи «100 мектеб» проектдин гележегдин артмиш’валин месэлйириз бахш дапIнайи совещание кIули гъубхну. Дугъу улихьди гьисабназ гъадагъну адру, амма гъагъи гьялнаъ айи мектебарра проектдик кирчбан чарасузваликан гъапну.
КIваин апIуз ккундучуз, «100 мектеб» проект Дагъустандин Глава Владимир Васильевдин жягьтлувалиинди гьяракатнаъ ипуб вуйи. Думу проект гъагъи гьялнаъ айи мектебарин материалинна техникайин бина мюгькам апIбаз диш дапIнайиб ву. Республикайин ва ерли бюджетарилан гъайри, проект уьмрин гьяятназ кечирмиш апIбан бадали, финансарин кюмек тувуз ккуни хусуси касар, дилаварчйир жалб апIура. Гъябгъюрайи йисан ноябрин вазлиъ яшайидинна экономикайин цирклиан вуйи вари Урусатдин конкурсдиъ гьаму проектди кьюбпи йишв гъадабгъували дидин мяналуваликан ва важиблуваликан кIура.
Проектдин артмиш’валин важиблуваликан чан удучIвну улхбаъра къайд апIури, Уммупазиль Уьмаровайи гъапиганси, дидин асас метлеб – республикайин урхбан идар-йириъ аьгьвалат къайдайиз хувал ву. Проект гьяракатнаъ айи кьюд йисандин арайиъ 283 мектеб рас гъапIну. Думу ляхнариз 600 миллион манат республикайин, 93,5 миллион манат – муниципалин районарин ва шагьрарин округарин бюджетариан жара гъапIну. Гьаддихъди сабси, 213,5 миллион манат меценатарира тувну.
Проектдин кюмекниинди республикайин 101 мектебдиъ цIа кабхъбан хатIалувалихьан уьрхювал мюгькам апIуз, 188 мектебдиъ манишин тувру гъурулуш къайдайиз хуз, 10 мектебдиъ медпунктар ар-ццуз мумкинвал гъабхьну. Ужудар натижйириз дилигди, рас апIру мектебарин кьадар артухъ апIбан бадали, проектдиъ дигиш’валар тIаъну ккунду.
РД-йин Главайи, проектдин 2018-пи ва 2019-пи йисарин артмиш’валин тажруба гьисабназ гъадабгъну, гележегдиъ субсидйир жара апIбан бадали, проектдик кирчру мектебар гъядягъбан гьякьнаан кьатI’и дигиш’валар арайиз хуб табшурмиш гъапIну. Проект уьмрин гьяятназ кечирмиш апIурайи министерствйирин ва идарйирин вакилар дидиъ тIаъну ккуни дигиш’валарикан гъулхну. Мектебариъ асас вуди расвалин ляхнар хьадан тятIиларин вахтна гъахувал метлеб вуди, арайиз адагъурайи теклифар конкурсдин къайдайиинди гьар йисан мартдин вазлиъ гъядягъюри уьмриз кечирмиш апIувал, уьмуми образованиейин идарйириъ расвалин вари ляхнар сатIиди гъахувал тямин апIувал ва гьацира жарадар вуйи.
Совещаниейиъ республикайин лап гъагъи гьялнаъ айи мектебаризра фикир тувнийи. Багахь гележегдиъ цIийи мектеб дивуз планламиш дапIнайи вая гьаму проектдиинди расвалин ляхнар гъурху мектебариан заявкйир гъафишра, дурар гьисабназ гъадагъидар.
Уммупазиль Уьмаровайи совещаниейин аьхириъ гьюкмин тамам апIру органарин вакилариз муниципалин образованйирин ва шагьрарин округарин главйирихъди сатIиди образованиейин идарйирин материалинна техникайин аьгьвалат бинайиан ахтармиш апIуз табшуругъ тувнийи.
