Ихь дагълу вилаятдин табиаьтдин утканваликан хайлин дибикIна, дупна. Улихьна йисари республикайиъ табиаьтдин марцциваликан гизаф улхури шулдайи. Фицики Дагъустандин гизаф районариъ цивилизацияйин лик ктрубкIу йишвар гизаф айи. Республикайин гъулариъ саб-кьюб урсал ади шуйи. Думу урсларра цIиб вахтналан пейиндиз илтIикIуйи. Гьаци вушра гъулариъ айи фельдшер урсал нирин, шид гъябгъру хулин багахь дарапIбан гъаразнаъ шуйи.
Хъа аьхиримжи йисари ихь респуб-ликайиъ хъархъас гатIабхьбан месэла лап учIруди дийибгъна. Жюрбежюр гъулариъ, шагьрариъ хъархъас дабхьру йишвар арайиз дуфна. Думу йишвариъ инсанари саринра ихтияр адарди хъархъас дабхьуз хъюгъну. Хъархъас дабхьру йишвахь жил, руг чIур хьуз хъюбгъру, мархь гъубгъиган, думу чиркишин штукди нириз гъябгъюру. Хъа, эгер хъархъас дабхьнайи йишвак цIа кипиш, зегьерлу кумру марцци гьавара чIур апIуру. Жара йишвариъ хъархъас тартиб апIру заводар а, Дагъустандиъ дицисдар заводарра адар. Агьалйирин уч гъабхьи вари зирзибил ихтияр тувнайи хъархъас дабхьру йишвариина гъабхуру. Дицисдар йишвар гъулар-шагьрарихьан ярхлади ерлешмиш духьна. Хъархъас гъабхбан бадали, асас метлебназ ишетмиш апIру машинар лазим ву. Гьяйифки, дицдар машинарра лап цIибтIан адар.
Аьхиримжи йисари Табасаран райондиъра хъархъас уч хьувалин, марццишин адрувалин месэла мялуматарин дакьатариъ кми-кмиди тянкьид апIура. «Табасарандин нурар» газатдин редакцияйиз Табасаран райондин глава Мягьямед Къурбанов гъафиган, гьадму месэла учура швнуб-сабан за гъапIнийча. Райондин главайи чав кьабул дапIнайи уьлчмйирикан ктибтнийи, амма месэла гьял дапIну ккудубкIурадар. Гъулариан хъади-хъади аьрзйир гъюра, месэла гьял апIуб ккун апIура.
Магьа декабрин 7-пи йигъан РД-йин табиаьтдин девлетарин ва экологияйин министр Набиюлагь Къарачаев Табасаран райондиз гъафнийи. Думу райондин гъулариан хъархъас адабгъбан месэлайиз бахш дапIнайи совещаниейиъ иштирак гъахьну.
Гьадму совещаниейиъ муниципалитедин глава Мягьямед Къурбанов, гъулан поселенйирин главйир, райондин депутатарин собраниейин депутатар, Табасаран райондиъ къанун уьбхру органарин вакилар иштирак гъахьнийи.
Душваъ къайд гъапIганси, гъябгъюрайи 2019-пи йисан кьабул гъапIу уьлчмйириз дилигди, райондин админстрацияйи жавабдарвал гъабхурайи «Экологи-Ка» фирмайиз гъулай шартIар яратмиш гъапIнушра, гъулариан хъархъас адабгъбан месэла гьял апIуз гъабхьундар, аьксина, думу имбубсан гъагъи гъабхьну.
Гъийин йигъаз муниципалитетдиъ хъархъас уч апIру 97 йишв тикмиш дапIна, душвариъ хъархъас уч дубхьна, багарихь дийигъуз даршлубсиб зегьерлу ниъ арайиз дуфна. Мягьямед Къурбановди къайд гъапIганси, аьхиримжи кьюб вазлин арайиъ хъархъас адабгъбан затра ляхин дапIнадар.
Чан терефнаан Набиюлагь Къарачаевди хъархъас адабгъбан месэла уртахъуб вуйиваликан гъапнийи. Дугъу гьацира муниципалитетдин кIулиъ айири хъархъас уч дубхьнайи йишварин шикларра хъади гьязур дапIнайи кагъаз райондиъ хъархъас уч апIувалихъан жавабдарвал гъабхурайи оператор гьюдюхюз кюмек тувру себеб вуйиваликан гъапнийи.
Месэла гьял апIбан натижйириз дилигну, рякъюн карта гьязур гъапIнийи. Думу бинайиз гъадабгъну, «Экологи-Ка» фирмайин кIулиъ айири саб гьяфтайин арайиъ гъуларин поселенйирин главйирихъди гюрюшар кIули гъахиди ва месэла гьял апIбан гьякьнаан йикьрар йитIиди.
Региондин операторин кIулиъ цIийди дийигънайи Мумин Къазибеговди совещаниейин иштиракчйирин улихь региондин операториина табшурмиш дапIнайи мажбурнамйир кIулиз адагъуз гаф тувнийи.
Совещениейин аьхириъ Набиюлагь Къарачаевди, «Экологи-Ка» фирмайи чан вазифйир фици тамам гъапIнуш ахтармиш апIбан бадали, саб вазлилан Табасаран райондиз гъюрза кIури, мялум гъапIнийи.
