Аьдат вуйиганси, гьар йисан декабрин аьхирариъ Дагъустандин артистари чпин яратмишарин ужударстар мяълийирикан гьязур дапIнайи концертдин программйириинди тамашичйир гьевеслу апIуру.
Му цирклиан табасаран эстрадайин хядарра кьяляхъ гъузрадар. Дурари жвуван халкьдин вакилар Дагъустандиъси, республикайихьан ярхлаъ ерлешмиш духьнайи шагьрариъра рази апIру рякъяр агура. Мисалназ, Мурад ва Гюльназ Гьяжигъурбановарин концертдин турикан вари Урусатдин шагьрариъ яшамиш шулайи табасаранариз мялумат деебхьнашул. Гъи узуз дурарикан ваъ, хъа гьар йисан аьхириъ Санкт-Петербург шагьриъ гъабхури аьдатнаъ абхънайи табасаранарин серенжемдикан ктибтуз ккундузуз.
Цци хьудпи ражари вуди Архимед ва Жамиля Исмяиловари Дагъустандин машгьур продюссер Тельман Абукаровдихъди сатIиди Санкт-Петербург шагьриъ табасаран артистарин концерт тешкил гъапIну. Гьаму йисан концертдин программа Марьям ва Надирбег Къазиеварин ва Мая Аьлимутаевайин мяълийирин бинайиинди гьязур дапIнайи. Серенжемдиз 200-дихьна тамашачйир уч гъахьну.
«Гьар йисан апрель вазлиъ Табасаран культурайин йигъ ва декабрин аьхирариъ – табасаран халкьдин мажлис гъабхувал аьдатнаъ абхъну, хайлин йисар ву. Ватандихьан ярхла шагьрариъ жвуван культура, чIал, халкьдин аьдатар уьрхювал важиблу ляхинси гьисаб апIураза. Му мажлисариз ихь халкь, чIал, ватан ккуни инсанар уч шулу. Учу дурарин юкIвар рази апIуз, дурариз кьабулди вуйи артистариз теклиф апIуз гьязур вуча. Аьхю шагьрариъ саб халкьдин вакилари чиб-чпихъди аьлакьйир уьрхюри, кми-кмиди сатIи шули, баяр-шубар сар-сарихъди таниш апIури, хал-хизан ккебгъуз кюмек апIури ккунду. Гьаци дарш, му кьадар инсанар айи шагьриъ миллет дубгуб мумкин ву. Артистари, фунури вушра, ихь сягьнайиин ухшар алапIуру. Гьаддиз сад йисан садариз, хъа йисан жара артистариз теклиф апIурча. Узуз концерт тешкил апIбаъ кюмек гъапIу Жамиляйиз, Наиляйиз, Тельмандиз чухсагъул мялум апIуз ккундузуз. Гьамдихъди сабси, ихь вари ватанагьлийир улубкьурайи ЦIийи йисахъди тебрик апIураза», – гъапну Архимед Исмяиловди.
Табасаранариз ЦIийи йисаз машквар тешкил апIуз жягьтлувал улупу касарра ктухидихьа: Наиля Гьяжигьюсеева («Петербургдиъ Дагъустандин жигьиларин дуствал» тешкилатдин вакил), Сафарчи Аскендеров (дилаварчи), Фаида Вагьабова, Сяаьдул-лагь Гьяжиаьгьмедов (Петер-бургдиъ Табасаран райондин Ярса гъулан агьалйирин кIулиъ айир), Гьяжирамазан Бенаталиев.
Къайд апIуз ккундузузки, концертдин программа гъябгъюрайи зал тамашичйири абцIнайи. Дурарин арайиъ, табасаран вакиларси, азербайжан, лезги ва дагъустандин жара миллетарин вакилар айивалиин лапра рази гъахьнийза.
