Гъябгъюрайи йисан 12-пи декабриъ Табасаран райондин культурайин хулаъ Дагъустан Республикайин писателарин Союздин табасаран секцияйин руководитель Сувайнат Кюребеговайин жягьтлувалиинди Шамил Къазиевдин 75 йис хьпаз бахш дапIнайи серенжем кIули гъубшну.
Табасаран райондин глава Мягьямед Къурбановди чан удучIвну улхбаъ гьар йисан Шамил Къазиев бабкан гъахьи йигъан, сабпи апрелиъ, гьамцдар серенжемар гъахурайиваликан гъапнийи. «Гъи шаир ихь арайиъ имдар, хъа вушра дугъу ихь багъри чIал, дидин девлет гъюбхну. Бабан чIал – гьарсаб халкьдиз аьсрариинди гъубзнайи варитIан багьалу хазна ву. Дугъу яратмиш гъапIу эсерар гьарган табасаран халкьдиз гъуллугъ апIури гъубзди. Бабан чIал уьбхбан гъаразнаъ айи, яратмиш апIбиин машгъул вуйи касарин зегьмет гьюрматназ ва тярифназ лайикь ву. Гьякимар гъягъюру, хъа халкь гъубзру», – къайд гъапIну дугъу.
Серенжем кIули гъабхурайи Сувайнат Кюребеговайи Шамил Къазиевдин инсанвализ аьхю кьимат тувнийи. «Шамил Къазиев ихь Табасарандиз фуж ву кIури гьерхиш, гьамци пуз шулу: Кьаркьул дагъдин завук кабснайи варитIан ягъал кIакI ва жвуван халкьдин кьисматнахъди сабси хъипну мяъли апIурайи Рубас нир… Шамил Рамазанович аьхю пешкешарихъ затра хъергнайир дайи, гьаз гъапиш варитIан аьхю пешкеш дугъу Аллагьдихьан гъадабгъну. Шаирик кайи гьунарра гьадму ву. Дугъхьан ухьуз аьхю девлет гъубзна – дугъан китабар ва гаф. Хъа варитIан багьалу дугъан китаб – халкьдин ирс вуйи фольклорин эсерар тартиб дапIну, сабпи ражари вуди дурар урус чIалназ илтIикIну, табасаран фольклор девлетлу вуйиваликан имбу халкьаризра хабар туву китаб ву кIури, гьисаб апIуз шулу. Шамил Къазиевди багъри культурайихъан юкIв убгурайи саб хайлин жигьил писателарра гьязур гъапIну», – натижа гъивнийи Сувайнат Кюребеговайи.
Дагъустандин халкьдин шаир, Дагъустан Республикайин писателарин Союздин къумугъарин секцияйин кIулиъ айи Шейит-Ханум Аьлишевайи чан улхбаъ Шамил Къазиев лап аьхю дережайин шаир вуйиваликан, бицIидариз дидикIнайи Шамилин шиърар чав къумугъ чIалназ илтIикIну, «Ппази» журналиъ чап гъапIуваликан ктибтнийи.
Даргйирин шаир, философияйин илмарин доктор Муса Бягьямедовди Шамил Къазиев рубзурайи булагъдихъди тевнийи, ДГУ-йин коллективдин терефнаан му касдин 75 йисаз бахш вуйи мяракайихъди табасаран халкь мубарак гъапIнийи ва шаириз бахш дапIнайи дарги чIалниинди саб шиирра гъурхнийи.
Шамил Къазиевдин дустар, дугъахъди М.Горькийин ччвурнахъ хъайи Литературайин институтдиъ саб курснаъ урхури гъахьи, Москвайиан дуфнайи Сергей Караковди ва Дагъустандин писателарин Союздин правлениейин вакил Марина Аьгьмедова-Колюбакинайи Табасаран райондин улихь-кIулихь хьайидариз ва мажлис тешкил гъапIдариз аьхю чухсагъул мялум гъапIнийи. Сергей Караковди Шамил Къазиев саб вахтнара аьхю гъуллугъариъ айи гьякимарин маш ккадру, хъа касиб халкьдиз гизаф гьюрмат апIру кас вуйиваликан гъапнийи. Чан улхбан аьхириъ дугъу чав урус чIалназ таржума дапIнайи Шамил Къазиевдин шиърар гъурхнийи.
Чпин улхбариъ табасаран шаирар ва писателар Пирмягьямед Аслановди, Шагьвелед Шагьмардановди, Керим Маллаевди, Эльмира Аьшурбеговайи, Аьбдулмажид Къурбановди, Аьб-дурягьим Аьбдурягьмановди, Рашид Аьзизовди, Кюребег Мурсаловди, Гьяжимягьямед Гьяжиевди, Аьб-дуллагь Аьбдурягьмановди Шамил Къазиевдин терефназ хайлин лайикьлу ва мани гафар гъапнийи, дугъан заан инсанваликан, мяна ва поэтика жигьатнаан уткан вуйи дугъан эсерарикан, кIван марцци гьиссарикан, багъри халкьдиз ва ватандиз шаирин вафалуваликан ктибтнийи.
УдучIвну улхбарин кьялягъди Рустам Рамазановди Шамил Къазиевдин гафариз вуйи «Фила ухьу рякъиди», Ханмягьямед Ханмягьяме-довди – «Сюгьринган» кIуру мяълийир гъапIнийи. Мидланра гъайри, серенжемдиъ Ккум’арин гъулан мектебдиъ урхурайи баяр-шубари Шамил Къазиевдин бицIидариз гъибикIу «Хъинцамегьмер» кIуру махъвраан саб сягьна улупнийи, Хючнаарин сабпи нумрайин кьялан мектебдиъ ва «Юлдаш» ЦО-йиъ урхурайидари дугъан шиърар тясирлуди гъурхнийи.
Шамил Къазиевдин хпир, шиърар дикIуз дугъак аьшкь капIри гъахьи кас Умижат Къазиевайи Дагъустандин писателарин Союздиз ва Табасаран райондин глава Мягьямед Къурбановдиз гьамциб серенжем гьязур апIбаз аьхю чухсагъул мялум гъапIнийи.
