Инсандиз сагъ’валтIан аьхю девлет адар. Думу уьбхювализ ихь уьлкейиъ вари шартIар яратмиш дапIна. Гъи сагъламвал уьбхбан, думу мюгькам апIбан зиин гизаф духтрар, аьлимар ва жара пишекрар лихура.
Улихьнаси узу Дербент райондин Жалгъан гъулаъ яшамиш шулайи Юсуф ва Сураят Бедирхановарин хизандихъди таниш гъахьнийза. Дурарин кюлфет Дербент шагьрин ва Дербент райондин жямяаьтдин арайиъ нумуналу ва савадлу кюлфетси гьисаб апIура. Бедирхановарин хизандин вакилари чпин уьмур инсарин сагъламвал уьбхювализ бахш дапIна. Юсуф Аьбдуселимовичди ва Сураят Камиловнайи чпин кьюрид баярра жямяаьтдиз мянфяаьт хру касарси тербияламиш гъапIну – дурар Дербент шагьриъ хирургарди лихура. Сарпи бай, Кьадир Бедирханов, Дербент шагьриъ 18-пи нумрайин мектеб гъизилин медализ ккудубкIну, Астрахандин медакадемияйик урхуз кучIвру. Медицинайин вузра уьру дипломдиз ккудубкIну, дугъу Астрахандиъ Кировский больницайиъ хайли вахтна ляхин гъапIнийи. Хъасин «Земский духтир» программайин бинайиинди думу Хив райондиз гьаъру. Душваъ 5 йисан ляхин дапIну, Дербент шагьрин ЦГБ-йиз хирургди гъюру. Дугъан уьмрин юлдаш Жамиля Урдихановнайира, медакадемия ккудубкIну, терапевт-кардиологди ляхин апIура.
Кьюрпи бай, Сабир Бедирханов, бицIидарин хирургди лихура. Дугъура Дербентдин 3-пи нумрайин мектебдиъ дурхну, Астрахандин мед-академия ужудар аьгъювалариинди ккудубкIну. Дугъан уьмрин юлдаш Камила Таримирзаевнайира, Дагъус-тандин медицинайин академия заан аьгъювалариинди ккудубкIну, Дербент шагьриъ онколог-маммологди ляхин апIура. Саб хизандиан юкьур духтир удучIвувал – му, шаксуз, аьхю хъуркьувал ву. Гьелбетда, думу хъуркьувалар сабпну арайиз гъафидар дар – албагну яшамиш шули гъахьи Юсуф Аьбдуселимовичдин ва Сураят Камиловнайи гизаф йисарин арайиъ гъизигу намуслу зегьметнан натижа ву.
Сураят Бедирхановайи ич гюрюшдиъ гьамци гъапнийи: «Йиз, мектебдиъ мялимвал апIури ва завучди лихури, 30 йистIан артухъ вуйиз. Мялим – асас кеспнан эйси ву. Дупну ккундуки, мялимди жямяаьтлугъдин улихь аьхю жавабдарвалин ляхин гъабхура. Дугъу жигьил наслиз зегьмет зигуз улупура, дурарикан Ватандиз лайикьлу инсанар гьязур апIура. Ихь насларин гележег абйир-бабарин ва мялимарин хилиъ а. Ва гьацира дурари жигьиларин уьмриъ уйнамиш апIурайи роль аьхюб ву. Узу чпиз тербия туву хайлин урхурайидар, жюрбежюр цирклариан пишекрар духьну, гъи ихь уьлкейин жюрбежюр пIипIариъ лихура. Йиз уьмриъ узу мялимвал апIур кIури, фикриъкьан адайиз. Йиз метлеб, духтир духьну, инсанариз мянфяаьтлу кас хьувал вуди гъабхьнийиз. Хъа йиз уьмриъ гъахьи жара дигиш’валарихъди аьлакьалу вуди, му метлебнахъ хъуркьуз гъабхьундайзухьан. Хъа гъи йиз веледариин, дурари йиз кIван метлебар тамам апIбиин фукьан-вушра разиди вуза. Баярра, швушварра духтрар вуди, йиз хизандиан мина жямяаьтдиз хайир хурайивалиин, уж’вал апIурайивалиин гизаф рази вуза. Му уьмриъ гьарсар касдиз варитIан багахь вуйиб чан хизан ву. Албагу хизан айивал дюн’яйин вари девлетартIан ужу ву, думу кIван рягьятвал ву.
Йиз кюлфетдин кIул Юсуф Аьбдуселимовичдира, Краснодариъ политехничес-кий институт ккудубкIну, хайлин гъуллугъариъ ляхин гъапIну. Узура гьадгъан уьмрин юлдаш ва кюмекчи, албагу бицIи хизандин зегьметкеш кас вуза. ГьартIан гьарин йимишар иццидар шулу кIури, ихь абйирин мисал айиб ву. Гъи магьа учуз йирхьур худул ачуз. Кьадириз кьюр ришна сар бай, хъа Сабириз – сар бай айиз, йиз риш Гюльнара Каспийск шагьриъ дуланмиш шула, ва дугъазра кьюр бай а. Аллагьдиз шюкюр ибшри, узу йиз веледариин фици рази вуш, имбу абйир-бабаризра гьациб разишин ккун апIурза».
Къайд апIуб лазим вуки, Юсуф Аьбдуселимовичдин ва Сураят Камиловнайин кюлфетдин вари вакилари, жвуван ляхнихъ юкIв хъади, намуслувалиинди зегьмет зигури, чпихьна вуйи гьюрматлувал мюгькам апIура.
Гъит, зегьмет зигуз ккуни Бедирхановарин хизандиз уьмрин гележегдиъ хъана аьхю шадвалар, чпин баяр-шубарин хъуркьувалар рякъри, кюлфетдин гьарсар вакилиз мюгькам сагъ’вал ва хушбахтвал ибшри.
