Инсан дюн’яйилан гъушиган, дугълан тина гъубзрайиб анжагъ халкьдиз гъапIу уж’вал, игьтияж айи вахтна туву кюмек, мюгьтаж духьнайирихьна кIвантIарикк инчI ккади илтIикIувал ву. Дицисдар касарин суратар, фукьан вахтар гъушишра, инсанарин юкIвариъ гъузру. Йиз кIваъра, уз’ин ил илмиди, Рамазан Насировичдин аку къамат, дугъу узуз читин вахтна гъапIу кюмек гъубзиди.

 

Хив райондин Ккувигъ гъулан агьали Рамазан Насиров Хив райондиъ гизафдариз намуслу касси, жавабдар инсанси, умун хасиятнан ва дугъри кIван сагьибси аьгъяйи. Думу хайлин вахтари Хив райондин образованиейин цирклиъ – мялимди, райондин образованиейин управлениейин начальникди ва начальникдин заместителди, комсомолин гъурулушдин сарпи секретарди, жюрбежюр муниципалин гъуллугъариъ гъилихну.

Учв наан лихурушра, жвуван вазифйир заан намуслувалиинди кIули гъахури, думу аьдати инсанарихьна ужуб гафниинди, гьюрмат ади янашмиш шуйи, чахьна илтIикIу фунур касдизра кюмек апIуз чарйир зигуйи.

Гизаф ватанагьлийириз дугъу читин вахтна кюмекнан хилра гьачIабккнийи. Гьаддиз чан гъарашугъарин ва халкьдин арайиъ ду-гъахьна марцци гьюрматна гьязат ади гъабхьну. Рамазан Насирович аьгъю вари касари дугъкан гъира анжагъ ужудар гафартIан кIурадар.

Дугъан марцци ляхин гьюкмин кIулиъ айидарира жюрбежюр пешкешариинди лишанлу гъапIнийи. Рамазан Насирович РД-йин муниципалин гъуллугънан лайикьлу ишчи вуйи, дугъаз, Урусатдин Федерацияйин сечкйирин гъурулуш артмиш апIбак киву лайикьлу пайназ лигну, 2004-пи йисан РФ-дин ЦИК-ди Гьюрматнан грамота тувнийи.

Рамазан Насирович аьхю хизандин кIулра вуйи, чан хпирихъди дугъу 9 велед дюрхну, дурариз уьмриз рякъ тувну.

Му кас ихь арайиъ имдарди цци миржид йис ву. Амма дугъу гизаф инсанарин уьмриъ гъибту аку шил затра дубгидар.