Декабрин аьхириъ гьарсаб идарайи, гъуллугъну, министерствойи ва тешкилатди чав йисандин арайиъ гъапIу ляхнин натижйир йивури шулу. Гьаци, декабрин вазлин 24-пи йигъан РД-йин журналистарин Союздиъра, йисандин натиж-йириз ва Союздин 60 йис хьпаз тялукь вуди, «Прессайин бал» кIуру серенжем кIули гъубшну.

 

Дидин дахилнаъди «Гъизилин люкь» конкурсдин лауреатарра пешкешлу гъапIнийи. Мидланра гъайри, му серенжемдиъ республикайин журналистика артмиш апIбак хайлин йисари чпин пай киву журналистарра пешкешлу гъапIну. Гьацдар журналистарин арайиъ республикайин «Табасарандин нурар» газатдин политикайин отделин редактор Гюльнара Мягьямедовара а. Гъябгъюрайи серенжемдиъ Гюльнара Мягьямедовайиз Урусатдин журналистарин Союздин председатель Владимир Соловьевдихьан вуйи грамота республикайин журналистарин Союздин председатель Аьли Камаловди тувну.

Му, Гюльнара Мягьямедовайинси, газатдин вари редакцияйинра хъуркьувал ву. Гюльнара Агъаризаевна му грамота тувбахъди тебрик апIури, дугъаз гележегдиъ хъана заан хъуркьувалар хьуб ккун апIурача.

«Табасарандин нурар» газатдин коллектив