Гъубшу гьяфтайиъ Дербент шагьрин ДДЮТ-дин залиъ 7-пи нумрайин мектеб-интернатдиъ урхурайи зяиф бицIидариз ва абйир-бабар адру баяр-шубариз ЦIийи йисаз концерт кIули гъубшну. Му мяракайин тешкилатчи – рягьимлувалин «Уж’валихъ хъугъ» фонднан кIулиъ айи Эльмира Гьюсейнова вуйи.
Эльмира Гьюсейновайи гъапиганси, абйир-бабари, бицIидарин гележег акуб хьпан бадали, дурариз чпин уьмур бахш апIуру, хъа абйир-бабарихъ мягьрум духьнайи, жандин зяифвал кайи баяр-шубарин гъайгъушнаъ хьувал, дурариз жюрбежюр мяракйир тешкил апIури, дурарихьди уьмрик умуд кивуз гъитувал ихь варидарин буржи ву.
Дупну ккундуки, аьхиримжи йисари читинвал кайидариз, йитимариз кюмек апIру тешкилатар гизаф духьна. ДумутIанра савайи, чпин хусуси дакьатарикан кюмекнан хил гьачIабккру касарра цIиб адар. Улихьнаси, ихь республикайин айтIан ляхнарин министерствойин пишекрарра иштирак духьну, Дербент шагьриъ гьамциб сабсан серенжем кIули гъубшнийи. Министерствойин вакилари читинвал кайидариз чпин маважибдикан пулин кюмек гъапIнийи.
«Гьарсар инсанди хъапIу уьмриан халкьдиз гьаммишанлугъ вуди кIваинди гъубзруб уж’вал ву. Инсанвалин буржарикан саб – шлубкьан ужуб гаф дапIну, жвув яшамиш шулайи гъулаъ, шагьриъ жямяаьтлугъдин, коллективдин арайиъ гьюрмат гъазанмиш апIувал ву.
Гьацдар инсанар ич гъийин мяракайиъра иштирак гъахьну, ва гьадрарин кюмекниинди думу тешкилра гъапIунза. Гьелбетда, му жюрейин серенжемар гъахуз жягьтлувал улупру ва бицIидариз кюмек апIру касариз чухсагъул мялум дарапIди гъузузра шулдар. Мицисдар мяракйирин гьаммишандин иштиракчи, Дербент шагьриъ дуланмиш шулайи гьюрматлу кас, «Мега» кIуру ариш-веришчивалин хулан генеральный директор Айваз Рамазанов, «Лакма» фирмайин вакил Василя Гьясанова, «БицIидарин гьяят» магазин, «Айма» сумчрарин агентство, Тельман Уруджевдин «Классный» магазин, рягьимлувалин фонд «СиратI» ву. Хайлин артистарра дуфну, мяълийирра дапIну, бицIидариз тешкил дапIнайи ЦIийи йисаз вуйи мярака аьхю шадвалиинди кIули гъубшнийи.
Му мяракайиъ Дербент шагьрин главайин кюмекчи Видади Зейналовра иштирак гъахьнийи. Дугъу, улубкьурайи ЦIийи йисра мубарак дапIну, хайлин ужудар гафар пуб’инди бицIидарин кефйир ачухъ гъапIнийи.
Гьелбетда, жандин зяифвал, аьжузвал кайириз мициб мярака тешкил гъапIну кIури, дурарин дерд терг апIуз даршул. Вушра, йискьубан арайиъ саб, кьюб ражарикьан гьамци ихь бицIидар кIваин апIувал ужуб ляхин ву»,
– къайд гъапIнийи Эльмира Гьюсейновайи.
Ихь абйирин айтуйиъ дупнайиганси, йитим хьуз ккайи велед бабан фуниъра идришри. Хъа зяиф, йитим бицIидариз гьаму шаду мярака тешкил гъапIу Эльмира Аьлибалаевнайин веледариз, хизандиз ва чаз сагъ’вал ккун апIури, дурар гъюрайи ЦIийи йисахъди тебрик апIураза.
