2019-пи йисан Дагъустандиъ мектебарин транспорт цIийи алапIуз 186,5 миллион манат жара дапIнайи. 31 муниципалитетдин мектебариъ урхурайи 5535 баяр-шубариз автобусар чарасуз лазимди вуйи. Магьа 2020-пи йис улубкьайиз цIиб вахт ккимиди Мягьячгъала шагьрин кьялан майдандиин республикайин мектебариз туврайи автобусар кьабул апIбан серенжем кIули гъубшну. Серенжемдиъ республикайин 165 мектебдин директорарихьна цIийи автобусарин жюлгер тувну.
Къайд апIуб лазим вуки, 2020-пи йисан июндин аьхириз РФ-дин вари субъектариъ йирси автобусар цIийидарихъди гьюдюхбан гьякьнаан вуйи РФ-дин Правительствойин къарар варитIан ухди тамам гъапIдарин арайиъ Дагъустанра а.
Автобусар баяр-шубар мектебдихьан ярхлаъ яшамиш шулайи йишвариъ айи мектебариз, гьацира бицIидар гъахруган рякъюн гьяракатнан хатIасузвал тямин дапIнайи муниципалитетариз масу гъадагъдар ву.
Табасаран райондин мектебариз 12 автобус тувну. Магьа думу мектебар: АхьтIарин кьялан мектеб, Гюгьрягъярин кьялан мектеб, Дарвагъ гъулан 1-пи нумрайин кьялан мектеб, Дарвагъ гъулан 2-пи нумрайин мектеб, Ярса гъулан кьялан мектеб, Къужникарин кьялан мектеб, Кьюрккарин кьялан мектеб СертIларин кьялан мектеб, Сиртчарин кьялан мектеб, ТинтIарин кьялан мектеб, Хили-Пенжигъ гъулан кьялан мектеб, Халгъарин кьялан мектеб, Хюрккарин кьялан мектеб.
Хив райондин 3 мектебдиз автобусар тувну: Асккан Ярккарин кьялан мектебдиз, Ляхлаарин кьялан мектебдиз ва Кашкентдин кьялан мектебдиз. Ляхлаарин ва Кашкентдин мектебариъ айи машинар, 10 йисантIан артухъ дилихну, йирси духьнайи. Хъа Асккан Ярккарин мектебдиз автобус сабпи ражари тувну. Дербентдин 9-пи нумрайин кьялан мектебдизра цIийи автобус тувну.
***
Медицинайин тяди кюмекнан 150 цIийи газель машинарра республикайин агьалйирин гъуллугъназ тувну. Дидин гьякьнаан РД-йин агьал-йирин сагъламвал уьбхбан Министерствойин асас сайтдиъ мялумат тувна. Гьадму кьадар машинарикан 108 машин республикайин бюджетдин гьисабнаан, хъа имбудар – федералин дакьатарихъ масу гъадагъдар ву. Саб пай машинар Дагъустандин районариъ ва шагьрариъ лихуз хъюгъна, имбударра ишлетмиш’вализ тувна.
Улупнайи кьадар машинарикан саб Табасаран райондин кьялан больницайиз, сабсана Дербент райондин кьялан больницайиз тувну.
ЦIийи йислан башламиш дапIну, ихь мектебариъ бицIидариз гъулай шартIар, хъа аьзарлуйириз медицинайин тяди кюмек артухъ шул кIури, умуд кивдихьа.
Гьюрматлу ватанагьилйир, цIийи машинар мянфяаьтлуди ишлетмиш апIуз сагъ’вал тувричвуз.
