«Табасарандин нурар» газатдин ккудубшу йисандин аьхиримжи нумрйирикан сабдиъ учу мялум гъапIганси, Роспотребнадзорин Дагъустандиъ айи Управлениейи Дагъустан Республикайиъ сар касдикан тмунурик кучIвру учIру иццрушнар тарагъбан ва гриппдиз аькси вуйи иммунизация тешкил апIбан аьгьвалатниин сикин дарди гюзчивал гъабхура.

 

Гъийин йигъаз Дагъустан-диъ тарагъру вирусарин учIру уьзрариан агьалйир аьзарлу хьувал эпидемияйиз илтIибкIнадар. Думу жюрейин уьзрариан гъубшу гьяфтайиъ республикайиъ 1855 кас ицц- ру гъахьну (гъубшу 2019-пи йисан тялукь вахтна 2206 кас аьзарлу духьну, гьисабназ гъадагънийи). Улихьна йигъари аьзарлу гъахьидарикан 722 кас Мягьячгъала шагьрин агьалйир ву.

Федералин «РД-йиъ айи ЦГиЭ» вирусологияйин лабораторияйиъ гьаму гьяфтайиъ 259 ахтармишар гъухну. Натижайиъ грипп уьзур кубчIвбан себебарихъди ва шартIарихъди аьлакьалу дару вирусар ашкар духьна.

Мидланра гъайри, Дагъустандиъ профилактикайин прививкйирин милли календарин бинайиинди гъабхури гъахьи гриппдиз аькси иммунизацияйин серенжемар аьхирихъна гъафну. КIулди прививка гъапIдарин уьмуми кьадар 1 293 801 кас, дурарикан 670 548 – бицIидар (пландин 89,1 процент) ва 623 253 – аьхюдар (пландиъ улупнайи кьадарнакан 88,2 процент) ву, гьаму гьисабнак бицIир хьуз гъагъдиъ айи 15 296 дишагьлийирра кахьра. Му улупбари республикайин агьалйирин уьмуми кьадарнакан 46 процент тяйин апIура.

Роспотребнадзорин РД-йиъ айи Управлениейи рес-публикайиъ учIру уьзрар ва грипп тарарагъбан гьякьнаан гъахурайи серенжемар давам шула.