«Табасарандин нурар» газат урхурайидар аьхиримжи вахтна газатдин 8-пи машнаъ чап апIурайи табасаран кроссвордарихъди таниш шула. Кроссворд гьязур апIувал рягьят ляхин дар, ва гьарсарихьан думу дюзмиш апIузра шулдар. Хъа ихь ватанагьли Загьирбег Агъабеговди думу бажаранвал ка.
Ккудубшу йисан ноябрин вазлиан мина газатдин саки гьарсаб нумрайиъ учу З. Агъабеговди гьязур гъапIу кроссвордар туврача.
Загьирбег Агъабегов 1979-пи йисан Хив райондин Асккан Яракк гъулаъ бабкан гъахьну, гьадушваъ дугъу мектебра ккудубкIну, чан хал-хизанра ккебгъну, хъа 2008-пи йисан Хив райондиз дахил шулайи Сюгют гъулаз кючмиш гъахьну. Дугъу кроссвордар дюзмиш апIурайивалилан гъайри, шиърарра дикIура.
«Узу йиз сабпи шиир мектебдиъ 8-пи классдиъ урхурайиган гъибикIнийза. БицIи классариъ урхурайиган, Дагъустандинси, табасаран литературайизра, асас фикир туври шуйза. Гьаму дарсариан ужудар кьиматарра диври шуйзуз. Гьадмуган поэзияйин жилгъайиъ йиз кьуватарра ахтармиш апIуз хъюгънийза. Узу гъидикIу сабпи шиърар – «Зегьметкеш Римихан», «Гъулан баяр», «Пияниска» ва хъанара жарадар – Хив райондин «Аку хяд» газатдиъ чап апIури гъахьнийи. Мидланра гъайри, «Дагъустандин дишагьли» журналиъра «Папрусчи Гьясан», «Гъулан магазнар», «Жигьил шубар» кIуру шиърар чап гъапIнийи.
Хъа кроссвордарин гьякьнаан кIуруш, дурарра гьадму вахтари «Аку хяд» газатдиз хътаури гъахьунза. Думуган гьязур апIури гъахьи кроссвордар мукьан аьхюдар дайиз», – кIура Загьирбег Агъабеговди.
Ич сюгьбатнаъ мялум гъабхьиганси, гъийин йигъаз дугъу дюзмиш дапIнайи кроссвордарин ва дидикIнайи шиърарин гъварч аьхюб ву.
Шубур веледдин адаш вуйи Загьирбегу 2010-пи йисхъан мина Урусатдин Яракьлу Кьувватариъ гъуллугъ апIура. Дугъу гьамусяаьт Чечен Республикайиъ ерлешмиш духьнайи Яракьлу Кьувватарин частнаъ, контрактдиин къул дизигну, электрикдин ляхин тамам апIура. Азад вахт ккабхъубси, Загьирбегу шиърар дикIури, кроссвордар дюзмиш апIури шулу.
Гьюрматлу ватанагьлийир, гъийин йигъаз учву му касди дюзмиш гъапIу кроссвордарихъди таниш вучва, гьамус дугъан саб шиърихъдира таниш йихьай. Имбу шиърар газатдин сайтдиъ чап апIидича.
Жейрандиз ухшар бахтавар
Гьяйран вуза, гюзел, ув’ин,
Му яв гюрчег кIалбариин.
Хуб уткандар ву яв улар,
Жейрандиз ухшар бахтавар.
Сабдикан дар увуз хабар,
Шад–хуррамди гьаъри вахтар.
Адар увуз кас барабар,
Жейрандиз ухшар бахтавар.
Бегьем духьну жигьил яшар,
Ирхну ярхи кIару кушар,
Хуб ка увук фурс, дамагъар,
Жейрандиз ухшар бахтавар.
Дигиш дапIну му яв даркбар,
Балгну назук жандин кIалбар,
Гьаъри ава уьмрин йигъар,
Жейрандиз ухшар бахтавар.
