Ккудушу йисарихь лигну, 2019-пи йисан Табасаран ра-йондиъ спортдиз аьхю фикир тувну. «БицIи бюджетдин спортдин майдан» кIуру проектдиинди спортдин 2 майдан ачмиш гъапIну (4-пи октябриъ СикIухъ гъулаъ ва 28-пи декабриъ Хючна гъулаъ стадиондин гъвалахъ). Ургубсан спортдин майднар – Хючна гъулаъ 2-пи нумрайин мектебдин гьяят-диъ, Акъа, Цалак, Къужник, Асккан Ягъдигъ, Гурихъ ва Хили-Пенжик гъулариъ – ккудукIну ачмиш апIуз гьязурди а. Табасаран райондин Хючна гъулаъ айи Кьалухъ Мирзайин ччвурнахъ хъайи спорткомплексдиъ манишин тувбан гъурулуш ва цIийи кабинетарра ляхник кирчну.
Табасаран райондиъ спортдин цирклиан гъадагънайи хъуркьуваларин, жигьилар спортдиин машгъул хьпаз яратмиш дапIнайи шартIарин ва дубхнайи ляхнин йисандин натижйирин гьякьнаан узу райадминистрацияйин культурайин, спортдин, туризмдин ва жигьиларин политикайин отделин кIулиъ айирин заместитель Садикь Уьсмановдихъди сюгьбат гъубхунза.
– Садикь Аьлимягьямедович, 2019-пи йисан Табасаран райондиъ спортдин цирклиан фицдар серенжемар кIули гъухунчва?
– Табасаран райондиъ образованиейин управлениейихъди сатIиди спортдин юкьби мектебари ва Гь.Гьямидовдин ччвурнахъ хъайи спортдин мектебди 2019-пи йисан спортдин 60 аьхю серенжем кIули гъухну, гьадму гьисабнаан 2 серенжем республикайин дережайиндар. Гьацира йисандин арайиъ спортдин цирклиан жюрбежюр талитар тешкил гъапIунча – футболиан, волейболиан, ктикьу жюрейин кчIихбариан, ушу-саньдайиан ва хиларихъди кчIихбаан.
Гьаци, 23-пи февралиъ къайд апIру ватан уьбхрударин Йигъаз тялукь вуди къуршагъ бисбаан, ушу-саньдайиан ва волейболиан талитар гъухну. 22-пи мартдиъ Эбелцан машквриз тялукь вуди пучIу атлетикайиан, спортдин милли жюрйириан талитар кIули гъушну. 25-пи августдиан 28-пи августдиз Табасаран райондиъ урус шашкйириан Дагъустандин чемпионатра кIули гъубшнийи. Дупну ккундуки, вари серенжемариъ гъалибчйир ва пешкешнан йишвар гъадагъдар кубкйирихъди, дипломарихъди, багьалу пешкешарихъди лишанлу гъапIну.
– Табасаран райондиъ 2019-пи йисан ГТО-йин нормативар тувбан ляхин фици тешкил гъапIунчва?
– Мартдин вазлиъ ВФСК ГТО-йиан нормативар тувбаан Табасаран райондин мектебариъ урхурайидарин арайиъ, 3000 бай-риш иштирак духьну, серенжемар кIули гъушну. Думу серенжемариъ иштирак гъахьидарикан 40 касди гъизилин лишнар, 60 касди – арсран ва 60-сан касди – йифрин лишнар гъазанмиш гъапIну.
– Узуз аьгъюганси, Табасаран райондиъ гьар йисан, адлу касар ва игитар кIваинди гъитбан бадали, жюрбежюр, гьадму гьисабнаан спортдин цирклианра, серенжемар гъахуру. Гьадрариканра ктибтуб ккун апIураза.
– Дюз кIурава, думу серенжемарра аьдатнаъ ирчнача 20-пи апрелиъ ЦIурутIларин мектебдин спортзалиъ Хюрикк гъул’ан вуйи шейх Сиражудин Эфендийин гьюрматназ ва думу кIваинди гъбаз бахш вуди волейболиан республикайин турнир кIули гъубшну.
Майдин машкврарин йигъари Табасаран райондин гъуларин администрацйирин командйирин арайиъ Аьхю Гъалибвалин 74-йис хьпаз тялукь вуди футболиан, волейболиан, пучIу атлетикайиан, теннисдиан, шашкйириан, шахматариан, кчIихбариан, ушу-саньдайиан спортдин яркьу талитар кIули гъушну, ва дурариъ 3000 кас иштирак гъахьну.
Табасаран райондиъ «СатIиди ужу ву» кIуру проектдин дахилнаъди Кьягьялвалин ордендин сагьиб Марат Рягьметовдин гьюрматназ спортдин талитар гъахури йирхьуд йис ву. 2019-пи йисан июндин вазлиъ Хючна гъулаъ кIули гъушу думу талитариъ мектебдиъ урхурайи 5000 баяр-шубар иштирак гъахьну.
7-пи ноябриъ Хючнаарин сабпи нумрайин мектебдин спортзалиъ райондин полицияйиъ лихури гъахьи аьхюнур лейтенант Габиль Аьбдулов кIваин уьрхбаз ядигариз бахш вуди мини-футболиан турнир кIули гъубшну. Турнириъ 10 команда иштирак гъахьну.
– Гъуларин поселенйирин арайиъ спортдин серенжемар гъахбан тажруба аничв?
– Ав, думу ляхнизра фикир туврача. Сач, августдин вазлиъ физкультурникдин Йигъаз тялукь вуди гъуларин арайиъ футболиан, волейболиан ва пучIу атлетикайиан талитар тешкил гъапIунча, ва дурариъ тахминан 1000 кас иштирак гъахьнийи.
Сентябрин вазлиъ Табасаран райондин 90 йис хьпаз бахш вуди гъуларин поселенйирин командйирин арайиъ футболиан, волейболиан, пучIу атлетикайиан, шашкйириан ва шахматариан, уьмуми гьисабниинди 1000-хьна касар иштирак духьну, яркьу талитар кIули гъушнийи.
5-пи октябриъ Хючна стадиондиин ВФСК ГТО-йин нормативар тувбаан чемпионатдиъ гъулариан 50 кас иштирак гъахьну. Му серенжем «Дурубхъру Урусат» кIуру федералин программайин дахилнаъди кIули гъабхурайиб ву.
8-пи декабриъ Хюрикк гъулаъ райондин спортдин юкьби мектебариъ ва Гь. Гьямидовдин ччвурнахъ хъайи спортдин мектебдиъ гьязур шулайи спортсменарин арайиъ грепплингдиан чемпионат кIули гъубшну.
Ва йис ктабхъурайи йигъан, 31-пи декабриъ, «Хючна гъулан совет» СП-йиъ 2005-2006-пи йисари бабкан гъахьидарин арайиъ мини-футболиан турнир кIули гъабхбиинди спортдин йис ккудубкIунча.
– Садикь Аьлимягьямедович, чухсагъул интервью тувбаз. Гележегдиъ апIурайи ляхниъ хъана аьхю хъуркьувалар ишричвуз.
