Урусатдин Федерация, «Йисандин Европайин гьар» гъядябгъбан бадали, вари халкьарин арайиъ вуди тешкил дапIнайи конкурсдиъ иштирак шули, цци 4 йис ву.
Му конкурсдин асас метлеб – табиаьтдинна культурайин цирклиъ гизаф йисарин гьарари уйнамиш апIурайи роликан ктибтувал ву. Имбуну конкурсариъси дарди, му конкурсдиъ асас фикир гьарин тарихдиз ва дидин инсанарихъди вуйи аьлакьайиз тувра. Гьар йисан конкурсдин тешкилатчйири варитIан маракьлу тарих айи гьар абгура. Гъубшу йисан му вари халкьарин арайиъ гъубшу «Йисандин Европайин гьар» конкурсдиъ, Урусатдиан иштирак гъабхьиб Калмыкияйиан вуйи гъавгъин гьар ву.
РД-йин ярквран мяишатдин Комитетдин регьбрин вазифйир вахтназ вуди тамам апIурайи Вагьаб Аьбдулгьямидовди, ихь республикайин агьалйирикра гьевес капIбан бадали, «Йисандин Дагъустандин гьар» кIури ччвур тувну, конкурс тешкил гъапIну. Янаки, республикайин агьалйириз Йисандин гьар гъядябгъюз мумкинвал а. Конкурсдиъ иштирак хьуз ккуни касарихьан гьарин шиклар ва дидин тарихдикан дибикIну РД-йин ярквран мяи-шатдин Комитетдиз хътауз шулу. Дагъустандиъ гъалиб гъабхьи гьар Урусатдин дережайиъди конкурсдиъ иштирак хьибди. Хъа, эгер думу гьар федералин дережайин конкурсдиъ гъалиб гъабхьиш, дидхьан вари халкьарин арайиъ вуди гъябгъюрайи «Йисандин Европайин гьар» конкурсдиъ иштирак хьузра шулу.
Вагьаб Аьбдулгьямидовди къайд гъапIганси, му конкурсдиъ иштирак хьпиинди, ухьхьан ихь региондиз, Урусатдианси, харижи уьлкйирианра туристар жалб апIуз шулу. Дидланра савайи, конкурсдин гъалибчийиз гьариз лигуз, думу уьбхюз пулин дакьатарра деетиди, гъалиб гъабхьи гьар Урусатдин гизаф йисар вуйи гьарарин Милли реестризра гъадабгъиди.
Эгер учвуз конкурсдиъ иштирак хьуз ккундуш, гъябгъюрайи 2020-пи йисан 1-пи мартдиз ичв аьрза (шикил ва гьарин тарихдикан ихтилат) РД-йин ярквран мяишатдин Комитетдиз ясана Комитетдин электрондин адресназ (leshoz1958@mail.ru) хътауз шулу.
