Гьякьикьатди субут апIурайиганси, саки вари терефариан заан технологйир гъизгъинди артмиш шулайивалин натижайиъ гъи агьалйириз хайлин гъулайвалар духьна.
Гьаци вушра, гъийин девриъ жямяаьтлугъдин сагъламвал уьбхбан месэлйири саб жерге учIру месэлйирин арайиъ важиблу йишв дибисна. Уьлкейин сагъламвал уьбхбан ва мюгькам апIбан гъаразнаъ айи гъуллугъарин улупбариз асас вуди, яшайишдин гизаф гъулайвалар айи му заманайиъ вари терефариан мюгькам сагъламвал хъайи инсан тек-бирра алахъури имдар. Тялукь гьякьикьатдин себебарин сиягьра бицIиб дар. Дурарикан жара вахтна улхидихьа, хъа му макьалайиъ узуз сагъламвалин бина вуйи марццишин уьбхбакан улхуз ккундузуз.
Улупнайи месэла гьял апIбан шилнаъди Урусатдиъ, гьадму гьисабнаан Хив райондиъра, хайлин серенжемар кьабул дапIна. Вушра гьелелиг гьякьикьат рази шлу гьялнаъ адар.
Йишвариин марццишин тямин апIбан гьякьнаан цIийи къайдйириина улдучIвувал метлеб вуди, ккудубшу йисан эвелариан башламиш дапIну, му месэлйир гьял апIбан жавабдарвал Урусатдин аьтрафариин кьувватнаъ айи «Экологи-ка» тешкилатдин РД-йин ЮТО-йиъ тяйин дапIнайи вакилари гъабхуз хъюгънийи. Вахтназ улихьна тартиб гъапIу пландиз асас вуди, жикъи муддатнаъ гъулариан зирзибил гъабхбан ляхинра тешкил гъапIнийи, амма саб жерге агьалйирин му месэлайихьна вуйи вижнасузвалин натижайиъ, кьатI’иди гъапиш, улупнайи метлебарихъан лазим вуйи кьадар гьякъи тутрувбаз лигну, му серенжемар дерккну. Гьамусяаьт йи-швариин марццишин тямин апIбахъан гьич сарира жавабдарвал гъабхурадар гъапишра, кучIал шулдар. Гъуларин агьалйири адагъури ккабхъу йи-швахь зирзибил айи акетарна шишлар дахьбан дюшюшари анжагъ пашман апIура.
Къайд апIуз ккундузуз, улубкьнайи йисан эвелариан му тешкилатдин оператор дигиш духьна. Ляхин къайдайиз гъюр дупну, умуд кивурхьа. Республикайин шагьраризна районариз му метлебариз улупнайи гьякъийин кьадарнакан гъапиш, думу сабсиб дар: гъулариъ дидин кьадар шагьрариътIан цIиб ву. Вушра…
Месэлайин жара терефнаканра дарпиди гъитуз шулдар: гъулариъ хайлин хизанариъ, жигьилар гьисабнаъ ади, дурар шагьрариъ яшамиш шулайивалин дюшюшар гизаф алахьура. Тялукь аьгьвалатнаъ марццишин тямин апIру вакилари къанунарин бинайиинди гьисабнаъ айи вари ватандашарихъанди гьякъи гъадабгъувал лазим ву. Амма агьал-йири му месэлайизра аьксивал улупура.
Шаксуз, марццишин – фунуб хъуркьувалинра, сагъламвалинра диб ву. Тялукь саягъниинди марццишин тямин апIбиина улдучIвували ихь табиаьт ккапIрайи зирзибилихьан уьбхюз мумкинвал тувди. Хъа месэлайин жара терефназ гъилигиш, гъи абйир-бабарин пенсйириланна бицIидарин пособйирилан савайи, сарун саб жюрейинра гъазанж гъюри адру хизанар Хив ра-йондиъ гизаф а. Хъа тялукь хизанариз му харжариз гьюкуматдин терефнаан субсид-йир гъадагъбан мумкинвалра тувна. Гьаддиз, агьалйирихьна илтIикIури, пуз ккундузуз: гьюрматлу ватанагьлийир, ихь мюгькам сагъламвал, аьтрафарин гюрчег’вал ва артмиш’вал ухькан гьарсарикан асиллу ву. Марццишин тямин апIувалтIан, думу уьбхювал важиблу ляхин ву. Му ляхнихьна вижнасузди янашмиш махьанай! Фицики жямяаьтлугъдиз сагълам гележег яратмиш апIувал, текрар шулза, ухькан гьарсарикан асиллу ву.
Шиклиъ: Хив райондин Лика гъулан кюче.
