Январин 14-пи йигъан «Дагъустан» РИА-йин конференцйир гъахру майдандиин Дагъустан Республикайин жилинна мутмуйин аьлакьйириз лигру министр Агъарягьим Къарагьяжиев республикайин журналистарихъди гюрюшмиш гъахьну. Гюрюш министерствойи 2019-пи йисан гъапIу ляхнарин натижйир йивбаз бахш дапIнайиб вуйи.
Конференция ачмиш апIури, министри чпин идарайи али йишвлан дирибшвру мутмуйиз гьюкуматдин кадастрин кьимат тувбан ва жиларин инвентаризация апIбан гьякьнаан сач гъубху ляхникан ктибтну. Дугъан гафариинди, РД-йин Халкьдин Собраниейин депутатарра жалб дапIну, республикайин вари миниципалитетари му ляхин ужуди кIули гъубхну. Яна гьарсаб муниципалитетдиз чаз дахил шулайи жиларин ва душваъ айи йишвлан рибшвуз даршлу вари мутмуйин кадастрин кьимат тяйин апIуз мумкинвал тувну.
Министри мялум гъапIганси, кадастрин кьимат тяйин апIбан серенжем шубуд йисак саб ражари гъабхурайиб ву. Хъа му жюрейиинди кадастрин кьимат тяйин апIбан ляхин гъабхури, республикайиъ сабпи раж ву.
«Пуз ккундузузки, кадастрин тяйин апIурайи кьимат гьякьлуб ва базарин кьиматтIан асккануб дубхьну ккунду. Ихь республикайин дахилнаъ айи жиларин кьадар 1,8 миллион гектар (3048 жиларин участокар) ву. Гъийин йигъаз гьадрарикан 1000 участокдин инвентаризация дапIну ккудубкIна. Вари ляхин тамам дапIну ккудубкIбан кьяляхъ, «Дагъустан Республикайин жиларин фонд» портал тешкил апIиди.
Мидланра гъайри, пуз шулуки, республикайин агьалйириз интернетдиан чпин кадастрин нумра аьгъю апIуз мумкинвал тувган, дидкан хайлин дюз дарувалар айиб ашкар апIуз учузра кюмек гъабхьну. Гьамус ич улихь дийибгънайи асас вазифа – республикайиз айи вари жил, девлет дюз къайдайиз хувал ву. Инсанарра учу апIурайи ляхнин дюзди гъавриъ ахъну ккунду, фицики кадастрин кьимат тяйин апIбахъди аьлакьалуди гъабхурайи ляхин – му ухьу, ихь республикаси, ихь районра, ихь гъулра ужуб терефназди илтIикIбак киврайи пай ву», – гъапну министри.
Конференцияйиъ министри къайд гъапIганси, кадастрин кьимат тяйин апIру вахтна асас фикир документариз тувну ккунду. Яна думу тикилиш фуну йисан яратмиш гъапIуб вуш, думу дивруган фициб ерийин материал ишлетмиш дапIнаш ва жара месэлйириз. Агъарягьим Къарагьяжиевдин гафариинди, ихь республикайиъ кадастрихъди аьлакьалу вуйи вари ляхнариз лигурайидар «Дагтехкадастр» тешкилатдин гъуллугъчйир ву. Гьацира къайд дапIну ккундуки, гъябгъюрайи йисан 1-пи январихъан мина гъалатIар кади кадастрин кьимат тяйин дапIнайи жилар ясана йи-швлан рибшвуз даршлу мутмуйихъди аьлакьалу дюз дарувалар къанундин къайдайиз хпан бадали вуйи аьрзйир кьабул апIура.
Журналистарихъди вуйи гюрюшдиъ министри хайлин месэлйирикан, апIурайи ляхнарикан мялуматар тувнийи. Гьадрарин арайиъди Дагъустан Республикайиъ миркклин майдан яратмиш апIуз ккайиваликанра мялум гъапIнийи. Дугъан гафариинди, Мягьячгъалайиъ айи ипподромдин жилариин мициб майдан тикмиш апIуз 6 гектар жил жара дапIна. Асас вуди думу майдан республикайиъ хоккейин, фигурный катаниейин спорт артмиш апIуз вая жара жюрбежюр серенжемар кIули гъахуз яратмиш апIурайиб ву.
Мидланра гъайри, Агъа-рягьим Къарагьяжиевди, рес-публикайин ГУПариканра мялуматар туври, Хив ва Табасаран районариъ айи ГУПариканра гъапнийи. Дугъан гафариинди, Хив ра-йондиъ сач «Хиварин халачйирин фабрика» ва «Мажвгларин халачйирин фабрика» ГУПар тазакIултIан цIийи алаъну. Хъа, Табасаран райондин «Сардаров» ва «Табасаран» ГУПар хъяркьбан ляхин фици гъябгъюра, кIури гьерхиган, министри, душваъ гьелелиг гьял апIуз гъагъиди гъузрайи месэлйир гизаф а, гъапнийи. Табасаран райондин гьаму ГУПарин гьякьнаан гъюру нумрайиз мялуматар дагну, газатдин машнаъ чап апIидича.
