Январин 6-14-пи йигъари Къизлар шагьрин кьялан больницайиз зегьерлу хьувалин лишнар кади 32 кас, гьадрарикан 10 бицIир, гъахну. Роспотребнадзорин РД-йиъ айи Управлениейин улупбариинди, эпидемиологияйин силисарин натижйириан ва инсанарин гафариан мялум шулайиганси, аьзарлу духьнайидари дурубхьу шид гъубхъну.

Январин 16-пи йигъаз РД-йин сагъламвал уьбхбан Министерствойин пресс-гъуллугънаан туврайи мялуматариинди, Къизлар шагьрин больницайиъ фунинна рудрарин сарикан тмунурикна тарабгъру уьзриан аьзарлу духьну 102 кас ккаъна. Къизлар шагьрин ЦГБ-йиъ ккаънайидарин арайиъ 50 бицIир а. Аьзарлу духьнайидарин гьял лап гъагъиб дар. Дурариз варидариз лазим кьадар медицинайин кюмек тувра.

Къизлар шагьриъ фунинна рудрарин уьзур ачмиш хьувалин месэла январин 16-пи йигъан Урусатдин МЧС-дин «Читин аьгьвалатариъ идара апIбан милли цент-риъ» ФКУ-йин начальник Александр Лекомцевдихъди гъубху видеоселекторин совещаниейиъра гьял гъапIну. Дагъустандин сагъламвал уьбхбан Министерствойин терефнаан думу совещаниейиъ республикайин сагъламвал уьбхбан Министерствойин кIулиъ айирин заместитель Раиса Шагьсинова ва РФ-дин РД-йиъ айи МЧС-дин министрин заместитель Муслим Девришбегов, гьацира Къизлар шагьрин мэр Александр Шувалов иштирак гъахьну. Раиса Шагьсиновайи туву мялуматариинди, гьамусяаьт Къизляр шагьриъ инсанар зегьерлу хьувалихъди арайиз дуфнайи гьял региондин сагъламвал уьбхбан министерствойин гюзчиваликк кка, душваъ аьзарлуйириз ужуб кюмек тешкил дапIна. Дидланра савайи, шагьриъ уьзур тарабгъувал дебккбан бадали, жюрбежюр серенжемар гъахура, агьалйир марцци штухъди тямин апIура. «Черемушки» райондиъ ва вари шагьриъ айи убхъру шид марцц апIбан ляхин тешкил дапIна. Агьалйирин хулариз шид хура, дурарикан чпин хулариъ шид убзру алатарин дизинфекция апIувал ккун апIура. Дагъустандин сагъламвал уьбхбан Министерствойи агьалйирикан гъубхьу ясана бутылкйириъ айи шид убхъувал, гъижикIу йимишариин убхьурайи шид улубзувал ккун апIура.