Гъубшу йисан декабрин вазлиъ гьюкмин ляхин кIулиз адабгъру органарин гъуллугъчйири гъапIу мянфяаьтлу ляхниз дилигну, уьлкейин 50 субъектдин дахилнаъди Дагъустандизра Федералин бюджетдиан 1,2 миллиард манат тувну.

 

Му кьадар пул фуну проектариз хаж гъапIиш ужу шул, кIуру суал хьади, учу Мягьячгъала шагьрин администрацияйин финансарин управлениейин отделин начальник Ниматуллагь Мусаевдихьна илтIикIунча.

«Шид – марццишнан кIул ву. Марцци шид адру йишваъ сагъ’валра даршул, гьаддиз, йиз фикриинди, гьаму пул сабпи нубатнаъди агьалйир марцци штухъди тямин апIбаз харж апIуз шулу. Кьюбпибсана, рякъярин месэлйир гьял апIувал Дагъустандиз чарасуз лазим ву. Гьамусра рякъяр адру гъулар-йишвар гизаф ами. Рякъ хътру гъулариъ инсанарра гъузри амдар, гьаддиз, ихь республикайин гъулар уьрхбан бадали, рякъяризра фикир тувуб ккун апIураза.

Республикайин шагьрарин гьялра думукьан ужуб дар. Наанди гъилигиш, шид рубзура: саб йишвахь убхъру штун турбйир йирси духьна, тмунуб йишвахь – канализацияйин шид гъябгъюра. Мягьячгъалайиъ шагьрин мяишатдин турбйир дигиш дарапIри, 40 йискьан ву. Хулариз дизигнайи элект-рикдин симарра фу гьялнаъ аш, рякъюрахьуз. Саб гафниинди, дапIну ккуни ляхнар гизаф а», – къайд гъапIнийи Ниматуллагь Шюкюровичди.

Дугъан фикриинди, инфраструктурайин артмиш’вал чарасуз лазим ву.