Мялум вуйиганси, гьар йисан 12-пи январиъ Урусатдин Федерацияйиъ прокуратурайин гъуллугъчийин Йигъ къайд апIуру. Уьлкейин прокуратура – му гьюкуматдин къанун уьбхбан кюгьне вахтарихъан мина айи гъурулуш ву. Прокуратурайи гьюкуматдин терефнаан РФ-диъ къанунар тамам апIбиин гюзчивал гъабхура.

 

 

Январин 10-пи йигъан Мягьячгъалайиъ РД-йин прокуратурайин идарайиъ Урусатдин прокуратура арайиз дуфну 298 йис тамам хьувализ бахш дапIнайи совещание кIули гъубшнийи. Му серенжемдиъ Дагъустандин Глава Владимир Васильев, гьюкмин органарин, къанун уьбхбан гъуллугъарин вакилар, республикайин прокуратурайин ветеранар иштирак гъахьнийи.

Совещаниейиъ уч духьнайидар Дагъустандин прокурор Алексей Ежовди РФ-дин прокуратурайин органарин гъуллугъчйирин йигъахъди тебрик гъапIнийи. Дугъу чан удучIвну улхбаъ, Урусатдин гьюкумат мюгькам апIури, ватандашарин ихтиярар ва азадвал уьрхюри, республикайин прокуратурайи дубхнайи ляхин къайд гъапIнийи:

«Гъубшу йисан прокурорари къанун чIур апIбан 70 агъзуртIан артухъ дюшюшар ашкар гъапIну. Федералин къанунариз асас вуди ич актар гьял апIбан натижйириинди 4 агъзуриинакьан ихтиярарин актар тамам дапIна, гъуллугъариъ айи 13 агъзуртIан артухъ касар жюрбежюр жавабдарваларихъна духна. Прокурорарин иштирак’валиинди 80 миллионтIан артухъ тешкилатариъ лихурайидарин тувну адру маважиб тувуз мумкинвал гъабхьну, гьюкуматдин ва муниципалин йитIнайи йикьрариинди дилаварчйириз тувну адру саб миллиарддилан зиина пул тувну, бюджетдиз налогарилан дару 350 миллион манатдин гъазанж гъювал тямин гъапIну. Дидланра савайи, прокуратурайин гъуллугъчйири гьюкуматдин ва муниципалин ахтармиш’валар гъахру органари кIули гъухьу юридический касарин ва хусуси дилаварчйирин ахтармиш’валар дюз дарударси гьисаб гъапIну».

Республикайин прокурори гьацира бюджетдин дакьатар, гьадму гьисабнаан медицинайиз, образованиейиз, рякъяр ва яшамиш шлу хулар тикмиш апIбаз, ЖКХ-йин ва манишин тямин апIбан цирклариз жара дапIнайи пул икI апIбан дюшюшар ашкар апIувализ асас фикир туври гъахьну. Прокурорарин иштирак’валиинди агъзрариинди ватандашарин ихтиярар чIур апIбан дюшюшар къанундин къайдайиз гъахну.

Алексей Ежовди къайд гъапIганси, экстремизмдихъди ва терроризмдихъди, коррупцияйихъди женг гъабхувалин, яшайишдин ва экономикайин, гьадму гьисабнаан сагълам’вал уьбхбан ва образованиейин цирклариъра, къанун тамам апIбиин гюзчивал гъабхбан, хизандин, йисар бегьем духьну адрударин, инвалидарин ва дилаварчйирин ихтиярар уьрх-бан ва гьацдар жара месэлйир гьял апIбан бадали, улубкьнайи йисанра гъизгъин ва албагу ляхин дубхну ккунду.

Дагъустандин прокурорарин корпусдин ляхнин ужудар натижйириз ва гъуллугънан буржи чешнелуди гъахбаз ва къанун тамам апIувал мюгькам апIбаз дилигну, Урусатдин Генеральный прокурори республикайин прокуратурайин 41 гъуллугъчи ва 5 ветеран гьюрматнан грамотйириинди лишанлу гъапIну.
Уч духьнайидар пишекарвалин машкврихъди Дагъустандин Глава Владимир Васильевдира тебрик гъапIнийи.