Урусатдин машгьур аьлим Дмитрий Лихачевди культурайин артмиш’валикан, му цирклиъ алахьурайи читинваларикан улхури, чан бикIбариъ «Библиотекйир лихури имбукьан гагьди, культура дубгидар», дупну, къайд гъапIну. Шаксуз, му гафариз дерин мяна а. Хъа гъизгъинди технологйир артмиш шулайи ХХI аьсриъ саб жерге дюшюшари зиихъ улупнайи келимайин дюзвал субутра апIура.
Жюрбежюр китабарна маракьлу журналар, хайирлу мялуматар кайи газатар уьрхюри, библиотекйири, дугъриданра, жямяаьтлугъдин уьмриъ аьхю роль уйнамиш апIура. Жиниб дар, зиихъ узу къайд гъапIганси, технологйир заан гъизгъинвалиинди артмиш хьпан натижайиъ, гьяйифки, жигьиларин арайиъ библиотекйирихьна вуйи маракьлувал йигълан-йигъаз зяиф шула, вушра тялукь гьякьикьатдиъ ижмиди къайд апIуз ккундузуз: китабдин кьувват я компьютерихьан, я телефондихьан эвез апIуз удукьруб дар.
Гьадму саб вахтна гьюкмин цирклиъ арайиз гъафи гъярмягъяришдин натижайиъ, вари уьлкейиъ ул’ан идипну, гъагъи гьялназ гъафи му циркилра аьхиримжи йисари хайлин улихьна дубшна. Культурайин артмиш’валин гъаразнаъ ади кьабул гъапIу уьлчмйирин натижайиъ Хив райондиъра хайлин уж’валнан дигиш’валар духьна. Гьаци, саб жерге гъулариъ клубарин ужагъарихъди сатIиди библиотекйирин ужагъарин аьгьвалатра ужу алапIна.
Улупнайи вахтназ Хив райондиъ ЦБС, дидин дахилнаъди бицIидарин библиотека ва 27 гъулан библиотекйирин филиалар ляхник ка.
– Библиотекйирин вакилари асас кьувватар агьалйирин вари гъатарин арайиъ китабарихьна вуйи маракьлувал жанлу ва яркьу апIбаз, китабарин кьувватлувалин, дурар урхбан мянфяаьтлувалин гъаврикк ккаъбаз сарф апIура. Ляхин лазим саягъниинди ккабалгбаз гъи ЦБС-диъ лазим вуйи вари шартIар яратмиш дапIна. ЦБС-дин филиаларин аьгьвалатнакан гъапиш, ЦIийи Фрюгъ, Кашкент, Мажвгул, Асккан Яракк, ГъуштIил, ЦIудихъ гъуларин ужагъар цIийидар ву. Имбу гъуларин ужагъарра саб гьял рас дапIна.
Гьамусяаьт райондин биб-лиотекйирин гъурулушдин уьмуми гьисабнаъ 127066 китаб а. Дурар асас вуди урус ва дагъустан халкьарин чIалариинди вуйи, жюрбежюр харижи чIалариан ихь чIалариз таржума дапIнайи китабар ву. Китабарин фонд, мумкинвалариз лигну, деврин тIалабариз асас вуди таза алапIбаз фикир туврача, амма…
Йишвариин библиотекйириъ гъабхурайи ляхникан гъапиш, учу саки гьарсаб серенжем мектебариъ урхурайи живанарихъди сигъ аьлакьайиъ ади гъабхурача. Жюрбежюр шаирарин ва писателарин яратмишариз бахш дапIнайи литературайин вечерар, жюрбежюр выставкйир гъахувал аьдатназ илтIибкIнача. Хъуркьуваларра ачуз, вушра гележегдиъ ляхин имбубсан жанлуди гъабхбиин зегьмет зигидича, – гъапну Хив ЦБС-дин директор Зумрият Сеидягьмедовайи.
