Гьарсаб хизандин, тухмин тарих – дурар яшамиш шулайи гъулан тарихдин саб пайси гьисаб шулу. Хизандин, гъулан, уьлкейин тарих аьгъю апIувал – жвуван халкьдин, уьлкейин тарихдин гьюрмат уьбхювал, тажруба ва ужудар аьдатар кьабул ва артмиш апIувал ву.

 

Кюгьне вахтари Табасарандиъ жвуван абайин, аьхю абйирин ччвурар аьгъюди хьувал инсанари ужудар, гьюрматлу тухмарин хатIси гьисаб апIури гъахьну. Ужуб арха-хира хъади хьувал – гьарсаб хизандиз Первердигар Аллагьди тувнайи пай ву. Хизандин тарих, тухмиъ гъахьи адлу касарин ччвурар, дурар фу ляхниин машгъул духьнайидар вуди гъахьнуш аьгъюди хьувал – му жвуван багахьлуйир ккуни, дурариз гьюрмат апIру гьарсар касдин буржи ву. Хъа тухмин тарих аьгъю касдихьан «тухмин гьар» арайиз хуз шулу. Тухмикан айи аьгъювалари уьмрихьинди цIийи жюрейиинди лигуз мумкинвал тувру.

Ухьу гизафдар, бицIи ватандиан кючмиш духьну, жара йишвариз дуфнайидар вухьа. Жилиин али чан бицIи ватан наан аш аьгъювали инсандиз чан бицIи ватандихъди аьлакьйир уьрхюз кюмек тувру. Гьарсаб гьариз чав жилик кибтIнайи ччивар айиганси, инсандизра ччивар а. Аьхю ва кьувватлу ччивар ккайи гьар чан йишв’ин мюгькамди аьхю шулу. Инсандин ччивар – дугъан арха-хира ву.

Гьаму улихьнаси газатдин редакцияйиз, «Тухмин гьар» дюзмиш апIбан гьякьнаан конкурс гъабхбан теклиф хьади, Расул Гьямзатовдин Фонднан вице-президент Гьябибат Аьзизова гъафнийи. Дугъу, мектебариъ урхурайи баяр-шубарин чпин тухмарин тарих аьгъю апIбахьна маракьлувал за апIбан бадали, конкурс гъабхурайиваликан мялуматар тувнийи. Гьябибат Нажмудиновнайи къайд гъапIганси, бицIидариз, гьелбетда, чпин абйир-бабарин кюмекра лазим хьибди. Сар кас гьадму ляхниин машгъул гъахьиш, тмуну касдикра гьевес кубчIвру. Гьаму ляхнихъ хъюгъиган, тухмин тарихдиан цIийи мялуматар аьгъю шули, хъана артухъ суалар арайиз гъюру ва думу суалариз жавабар агувалихъ хъана аьшкьлуди хъюгъру. Гьябибат Аьзизовайи, чан дадайин терефнаан вуйи тухмин аьхю абйирин ччвурар кайи гьар дюзмиш дапIну, думу чешнеди улупуз гъабхнийи (шиклиъ).

Конкурсдин метлеб – баяр-шубари чпин тухмин тарих аьгъю апIувал ву.

Дидиъ мектебдиъ урхурайи вари бицIидарихьан иштирак хьуз шулу.

Конкурсдиъ иштирак хьпан бадали аьхю абйирин ччвурар аьгъю дапIну, адашдин ясана дадайин «тухмин гьар» арайиз дубхну, думу кагъзик дизигну ккунду ва жвуван багахьлуйирин уьмриан маракьлу дюшюшарикан дидикIну ккунду

Конкурсдин материалар рефератси, сочинениеси дидикIну, редакцияйиз хъадаай. Учву дапIнайи ляхнихъди аьлава материалар (шиклар, плакатар, тарихдин дакьатарин копйир, ишлетмиш гъапIу китабарин ччвурар ва гьацдар жарадар) хъади гъахьиш, лапра ужу хьибди.

Конкурсдин натижйир 2020-пи йисан декабрин 15-пи йигъан мялум апIиди. Гъалибчйириз Расул Гьямзатовдин Фонднан идарайиъ грамотйир ва пешкешар тувди.