(Ниматуллагь Мусаевдин 60-йисандин юбилейихьна)

 Ниматуллагь Мусаевдин юбилей шулайивал мялум гъабхьиган, газатдин редакцияйи узуз му касдикан бикIувал табшурмиш гъапIнийи. Мусаеварин тухмикан бикIуз читинвал алабхъундарзуз, фицики, дурарикан аьгъдру табасаранар, Табасаран, Хив районариъси, ихь республикайиъра цIибтIан адаршул. Тухмин вакилари, чиб ужуб терефнахъанди кIваинди гъитбан бадали, гизаф зегьмет гъизигну.

 

Мусаеварин аьхю абйир – «Маллакьар» тухмин вакилар – Хив райондин Зюрдягъ гъул’ан Хючна гъулаз, ерли агьалйириз ислам диндиан аьгъювалар тувбан бадали, гъафидар вуйи. Гьаддихъан мина дурарин тухум Хючна гъулаъ яшамиш шули гъабхьну.

Ниматуллагь Мусаев 1960-пи йисан Табасаран райондин Хючна гъулаъ Шюкюр ва Марият Мусаеварин хизандиъ йирхьурпи веледди бабкан гъахьну.

Хизандиъ аьдат вуйиси, Ниматуллагь мектебдиъ чан тай баярин арайиъ варитIан ужуди урхрударикан сар вуйи. Гьеле гьадмуган «хьубариз» урхурайивализ дилигну, думу мектебдиан Краснодар крайин Туапсе шагьриъ ерлешмиш дубхьнайи «Орленок» лагериз гьаънийи. Ниматуллагь Мусаевди, мектебарин арайиъ, райондиъ, республикайиъ кIули гъягъру олимпиадйириъ иштирак шули, пешкешнан йишвар гъадагъури гъахьну.

Ужудар аьгъювалариинди кьялан мектеб ккудубкIну, Ниматуллагь Мусаев Дагъустандин гьюкуматдин гъулан мяишатдин институтдин экономикайин факультетдик урхуз кучIвру ва думу хьуд йислан заан хъуркьувалариинди ккудубкIуру.

Дугъу чан зегьметнан рякъ 1981-1986-пи йисари Ставрополь крайин «Нива» совхоздиъ кIулин экономистди лихури ккебгъну ва гьадму вахтна Ставрополин КПСС-дин крайкомдин марксизм-ленинизмдин университетра ккудубкIну.

1986-пи йисан, гъулан мяишатдин кадрйирин ляхин мюгькам апIбан бадали, Ниматуллагь Мусаев Табасаран райондиъ тазади ачмиш дапIнайи агропромышленный объединениейиз пландинна экономикайин отделин начальникди гъафнийи, хъа 1989-пи йисан Табасаран райондин агропромышленный объединениейин председателди ктагънийи. Чаз табшурмиш гъапIу фуну ляхинра намуслувалиинди кIулиз адабгъури, дугъу гизаф зегьмет гъизигну.

1994-пи йисан РД-йин Госсоветдин членар ва сарпи председатель ктагъруган, Дагъустан Республикайин Конституция кьабул апIруган, Ниматуллагь Шюкюрович Дагъустан Республикайин Конституцияйин собраниейиз Табасаран райондин агьалйирин вакилди гьаънийи. 1996-пи йисан думу Табасаран райондин администрацияйин главайин заместителди – гъулан мяишатдин управлениейин начальникди тяйин гъапIнийи.

Пишекарвалин заан аьгъювалар ва ляхин апIуз удукьувал айивализ, Дагъустан Республика бадали лайикьлу зегьмет зигбаз лигну, 1999-пи йисан июлин 21-пи йигъан РД-йин Госсоветдин Указдиинди Ниматуллагь Мусаевдиз «Дагъустан Республикайин лайикьлу экономист» ччвур ва «Республикайин улихь лишанлу хьпаз» медаль тувнийи.

2002-пи йисан Ниматуллагь Шюкюрович чан хизанра хъади Мягьячгъала шагьриз удучIвну гъафнийи ва 2012-пи йисазкьан Федералин казначействойин Дагъустан Республикайиъ айи управлениейиъ кIулин казначейди, ревизйир гъахру отделин начальникди гъилихну. 2009-пи йисан Москва шагьрин Федералин казначействойин управлениейин финансаринна мяишатдин ляхин ахтармиш апIруган, Нималуллагь Мусаев Урусатдин Федералин казначействойин комиссияйин ревизияйин ляхин ва аудит гъабхру дестейин кIулиъ тяйин гъапIнийи.

Чаз табшурмиш гъапIу ахтармишар гъахбан ляхин заан ери ади тамам апIбаз лигну, дугъаз «Урусатдин Федерацияйин гьюкуматдин ватандаш гъуллугънан 1-пи классдин теклифчи» кIуру ччвур тувнийи.

2012-пи йисан апрелин вазлихъан мина гъийин йигъазкьан Ниматуллагь Мусаев Мягьячгъала шагьрин администрацияйин финансарин управлениейиъ отделин начальникди лихура. Дугъу гьацира Дагъустандин гьюкуматдин технический университетдиъ бухгалтервалин ва бюджетдин гьисабар гъахбаан пишекарвалин дережа за апIбан дарсарра кивра.

2019-пи йисан Табасаран райондин глава Мягьямед Къурбановдин теклифниинди Ниматуллагь Мусаевди, асиллу дару эксперт вуди, райондин администрацияйин бухгалтерияйин гъуллугъчйирин аттестация, ва гьаддихъди сабси администрацияйин кадрйирин пишекарвалин дережа за апIбаъ лазим вуйи ляхин кIули гъубхнийи.

Гизаф йисари заан пишекарвалинди ляхин апIбаз лигну, Ниматуллагь Шюкюровичдиз Мягьячгъала шагьрин администрацияйин терефнаанра жюрбежюр гьюрматнан грамотйир тувна. Думу зегьметнан ветеран ву. 2013-пи йисан Меккайиз гьяждизра гъушну.

Узу Ниматуллагь Шюкю-ровичдихъди гюрюшмиш гъахьиган, дугъахъ, бицIидихъан мина яв кIваъ айи метлеб уьмриъ тамам апIуз гъубхьунухьан кIури, суал хъипнийза. Дугъу узуз гьамциб жаваб тувнийи:

– Сифте Николай Островскийин гафариинди пуз ккундузуз: «Сар касдин улихь ухьу гьарган буржлу вухьа – думу ихь дада ву». Йиз дада Марият – Игит баб ву. Дугъу, ихь аьдати табасаран хизанариъси, 10 велед тербияламиш гъапIну. Дугъу учуз байвахтнахъан мина кIури шуйи: «Ичв дарсар дургъай, улихь саб месэла дивну, думу тамам апIуз ичв кьувватниинди ва аьгъювалариинди чара зигай. Учву йиз йицIур велед вучва, йиз ккунивалтIан артухъ учвуз тувуз шлуб адарзуз. Гьарган ужудар ляхнар апIуз, гьякьлударди, намуслударди гъузуз дубгъай, уж’вал фила вушра кьяляхъ гъибди!»

Ич албагу хизан Табасаран райондин Хючна гъулаъ яшамиш шули айи. Дадайи гъапиганси, байвахтнахъан мина аьгъюваларихъ хъергну, намуслуди зегьмет зигуз гъудубгъунча. Гьелбетда, хизандин далу тереф уьбхюрайир дишагьли ву. Йиз гъийин хъуркьуваларик йиз умрин юлдаш Дюн’яназдин аьхю пай ка. Дугъахъди сатIиди учу юкьур велед тербияламиш гъапIунча. Бай Заур, Дагъустандин гьюкуматдин гъулан мяишатдин академияйин экономикайин факультет ккудубкIну, Табасаран райондин администрацияйин главайин заместителди лихура. Риш Мая, Дагъустандин гьюкуматдин университет ккудубкIну, Мягьячгъала шагьриъ социалин педагогди, хъа Лиана, Дагъустандин гьюкуматдин халкьдин мяишатдин университет ккудубкIну, «Дагдизель» заводдиъ аьхюну пишекарди лихура. БицIину шуру Заирайи Мягьячгъалайин лицейиъ урхура. Миржир худулра ачуз: Марият – финансист ву, Москвайиъ яшамиш шула, Мягьямедсяид ва Хасбулат – Санкт-Петербургдин милли гвардияйин Жуковдин ччвурнахъ хъайи дявдин институтдин курсантар ву. Худул Ханмягьямед – кадетарин арайиъ тхэквондойиан дюн’яйин чемпион ву, думу тхэквондойиан йисар бегьем духьну адру жигьиларин арайиъ кIули гъушу чемпионатариъра швнуб-сабан Урусатдин чемпион гъахьну.

Заан пишекарвалиинди, чан фагьумлувалиинди, чаз табшурмиш гъапIу ляхнихьна жавабдарвалиинди янашмиш хьувалиинди, улихь диву месэла кIулиз адабгъуз аьгъювалиинди Ниматуллагь Шюкюровичди гъарашугъарин, дустарин ва багахьлуйирин терефнаан гьюрмат гъазанмиш гъапIну.

 

P.S. Гьюрматлу Ниматуллагь Шюкюрович, багарихьди уву бабкан духьну 60 тамам шула. Му уьмрин бахтлу геренарикан саб ву. «Табасарандин нурар» газатдин редакцияйин терефнаан увуз мюгькам сагъ’вал, ляхниъ хъана заан хъуркьувалар ккун апIурача. Яв хизандиан гьюрмат, хул’ан берекет, веледарин ва худларин шад сесер затра кам даришри!