Гьар йисан январин 25-пи йигъан ихь уьлкейиъ студентарин Йигъ къайд апIури шулу. Урусатдин студентарин Йигъ 1755-пи йисан Москвайин университет ачмиш апIбахъди аьлакьалу ву.
Гьарсаб вуздиъ студентарин Йигъ къайд апIбан чпин хусуси аьдатар а. «Табасарандин нурар» газатдин редакцияйира Дагъустан Республикайин вузариъ урхурайи студентарихъди ужудар аьлакьйир уьрхюра. Гьаддиз машкврин йигъ къайд апIбак газатдин редакцияйира чан пай киври, студентарихъди гюрюш тешкил гъапIну.
Гюрюш ачмиш апIури, газатдин редакцияйин жавабдар секретарь Мегьти Аьдиловди вари студентар чпин улубкьурайи машкврихъди тебрик гъапIнийи. «Табасарандин нурар» газатдин редакцияйиз дуфнайи хяларин арайиъ, чаз кьюб образование ашра, аьгъювалар гъадагъбан ляхин давам апIурайи, Дагъустандин гуманитарный институтдин магистратурайиъ урхурайи «Ас-салам» газатдин редактор, Табасаран райондин имам Ансар Рамазанов, ДГТУ-йин магистратурайин кьюбпи курснаъ урхурайи Мягьрам Аьбдурягьимов, Жабряил Гьяжимурадов, Сабина Гьяжимягьямедова, ДагГАУ-йин шубубпи курснаъ урхурайи Тамерлан Шахсинов, Урусатдин правовой академияйин 2-пи курснаъ урхурайи Эльвира Гьяжикеримова ва 5-пи курснан студент Рамис Аьлибегов, ДГУ-йин филологияйин факультетдин 2-пи ва 3-пи курснан студентар – Раиса Исаева, Зубайдат Мягьямедова, Жавагьиль Наврузова, ДГПУ-йин дагъустан филологияйин факультетдин 1-пи курснаъ урхурайи Зульфия Мазалаева, Наида Гьяжимягьямедова, Къистамал Гьяжимягьямедова айи.
Редакцияйиз дуфнайи гьарсар студентди чпин университетдиъ айи шартIарикан, чпиз алахьурайи читинваларикан, хизандихьан ярхла вуди яшамиш хьуз фици дубгъури гъахьнуш, стипендияйин кьадарнакан, азад вахт фици адапIури шулуш ктибтнийи. Уч духьнайи студентар вари ужудар хъуркьувалар айи жигьилар вуйи, дурарикан варидари чпин гьаму йисандин саки вари имтигьнар тувну ккудукIурайи.
Гюрюшдиъ Ансар Рамазановди, хъанара аьгъювалар гъадабгъбахъ юкIв хъади, учв магистратурайик урхуз кучIвнайиваликан ктибтнийи. Дугъан фикриинди, инсандиз вари терефарихъан аьгъювалар айивали зарар тувудар, савадлу касдиз, ужуб пишейин эйсийиз, аьлимдиз жямяаьтдин арайиъ гьаммишан артухъди гьюрмат ади шулу.
Ихь студентар, чпин дарсар урхбалан савайи, уьлкейиъ, республикайиъ кIули гъягъюрайи конкурсариъ, грантар гъадагъбаъ, форумариъ иштирак шула. Мисалназ, Сабина Гьяжимягьямедовайи, Урусатдин жигьиларин грантарин проектарин конкурсдиъ гъалиб духьну, багарихьди чан проект уьмриз кечирмиш апIури, ДГТУ-йиъ «Этнова» милли культурайин фестиваль тешкил апIиди.
Студентарихъ газатдин редакцияйин журналистари, дурарин фикир фициб вуш аьгъю апIбан бадали, гъубшу йисан декабрин вазлиъ ихь республикайиз жара гъапIу федералин грантдин 1,2 миллиард манат фунуб ляхниз харж апIуз хай шулуш суал хъипнийи.
Аьхюну пай студентари думу пул сагъламвал за апIбан идарйир, бицIидариз багъар ачмиш апIбаз харж дапIну ккуниваликан гъапнийи. Мягьрам Аьбдурягьимовди учв Тарумовский райондиъ яшамиш шулайиваликан, хъа Табасаран райондиз гъушиган, чаз гъулариз гъягъру рякъярин читин аьгьвалат гъябкъюваликан гъапнийи. Дугъан фикриинди, пул рякъяр къайдайиз хуз харж дапIну ккунду. Гьаддихъди сабси, Рамис Аьлибеговди ихь республикайин, ихь районарин марцци табиаьт аьхиримжи йисари лап чиркин дубхьнайивал, гьамусяаьт гъулариъ думу месэлайиз цIибтIан фикир туври адрувал къайд гъапIнийи.
Студентарихъди Урусатдин Федерацияйин Президентдин Федералин Собраниейихьна вуйи Посланиейиканра сюгьбат гъубхнийча. Уч духьнайи жигьилари Посланиейин гьякьнаанра чпин фикрар ачмиш гъапIнийи. Мялимариз мектебдиъ класс кIули гъабхбаз иливу пул цIиб, хъа мялимди зигурайи зегьмет гъагъиб вуйиваликан гъапнийи. Студентари жигьил хизанариз, ихь республикайиъси, вари уьлкейиъра яшайишдин читинвалар алахьурайиваликан, дадавалин капитал сарпи бицIириз туврайиваликан гъапнийи, гъагъи аьгьвалатнаъ ахънайи хизанариз аьлава кюмекар туврайивалиин чпин разивал къайд гъапIнийи.
Гюрюшдин аьхириъ Мегьти Адиловди, ич тIалаб кьабул дапIну, газатдин редакцияйиз гъафи вари студентариз аьхю чухсагъул гъапнийи, дурариз хъуркьувалиинди сессия тувувал, урхувал ккудубкIну, ужуб кеспнан эйсйир хьувал, гъизигу жафа гьавайиди гъюдудубчIвувал ккун гъапIнийи.
