Дагъустан Республикайиз РФ-дин Правительствойи туву 1 миллиардна 267 миллион манат федералин грантдин дакьатар фуну цирклариз, фицдар проектариз харж апIуруш, Дагъустандин агьалйири 11 агъзурна 97 теклиф хътаъну. Дидин гьякьнаан 25-пи январиъ РД-йин экономикайин ва аьтрафарин артмиш’валин министр Гьяжи Султановди мялумат тувну.

Гьяжи Султановдин улупбариинди, теклифар региондин вари муниципалитетарин агьалйирихьан гъафну. Месэлайихьна варитIан гизаф жавабдарвал ади Мягьячгъала шагьрин агьалйир илтIикIну. Дурарин терефнаан 4942 теклиф гъафну, Каспийскдиан – 1015, Буйнакскдиан – 90, Къизлариан – 59, Избербашдиан – 54, Хасавюртдиан – 49, Новолак ва Табасаран районариан – 22 теклиф хътаъну. Гьацира Москва шагьрианра – 44, хъа Санкт-Петербургдиан – 2 теклифар гъафну. Му улупбари Дагъустандин гъирагъдиъ дуланмиш шулайи ихь ватангьлийирра республикайин варитIан учIру, сабпи нубатнаъ гьял дапIну ккуни месэлйирин гъавриъ айивал субут апIура.

Республикайин агьалйири федералин грантдин дакьатар харж апIбаан «Яшамиш шлу хулар ва шагьрин аьтрафар», «Сагъламвал» ва «ЖКХ» цирклариз варитIан гизаф теклифар хътаура.