РД-йин хатIасузвалин аьгьвалат фикирназ гъадабгъиган, гьякьикьатдиъ шулайи асас пай тахсиркарвалар агьалйири къанунсузди ва тялукь ихтиярнан бинайиинди яракь ишлетмиш апIувалин натижа ву. Му жигьатнаан анжагъ саб 2019-пи йисан республикайиъ 165 тахсиркарвал гьисабназ гъадагъна.

 

РД-йин аьтрафариин гъахурайи серенжемариз асас вуди, Хив РОВД-йин вакилари, февралин эвелариан башламиш дапIну, райондин ватандашарихъди дурари къанунсузди уьбхюрайи яракь ва жара тIуркIру сяняаьтар чпин хушниинди тувбан рякъ’ан ляхин жанлу дапIна.

Хив РОВД-йин начальник, полицияйин майор Камал Гьясановди гъапиганси, жвуван хушниинди яракь тувруган, гьарсаб яракьдихъан тяйин дапIнайи кьадарнаъди гьякъира тувра.

РФ-дин УК-йин тIалабариз асас вуди, къанунсузди яракь, тIуркIру сяняаьтар масу тувбаз ва гъадагъбаз, дурарихъди алвер апIбаз, дурар уьрхбаз ва саб йишвлан жара йишв’ина гъахувализ тялукь жаза улупна. Амма къанунсузди яракь уьбхбан жавабдарвалихьан думу жвуван хушниинди айтIан ляхнарин гъуллугънан гъуллгъчйирихьна тувували азад апIура. Ватандашарихьан яракь йисан аьхиризкьан кьабул апIиди.

Гьюрматлу ватанагьлийир, ихь ислягьвал ухькан гьарсарикан асиллу ву. Гьаддиз тялукь серенжемарихьна вижнасузди янашмиш махьанай! Наслариз бахтлу гележег ккабалгбак ичв пай кивай!