Республикайиъ гьяйвнарин спортдин Федерация арайиз дуфну цIиб вахттIан дар. Чпин федерацияйин метлебнакан Мягьячгъалайиъ 5-пи февралиъ гъубшу пресс-конференцияйиъ дидин вакилари ктибтнийи.

 

«Дагъустан кюгьне вахтарихъан мина гьяйвнариинди чпин дирбаш’вал улупру жигьил живанариинди машгьур вуйи. Инсандин уьмриъра гьяйвни важиблу йишв дибиснайи.Учуз гьадмугандин ужудар аьдатар ихь уьмриз кьяляхъ хуз ккундучуз. Учу тешкил дапIнайи федерацияйин метлеб – гьяйвнарихъди вуйи ляхнин машгьурвал, гьяйвнарин спорт артмиш апIувал ву», – гъапну РД-йин гьяйвнарин спортдин федерацияйин президент Зубай Мягьямедовди.

Гьяйвнарин спорт артмиш апIбахъди гележегдиз айи планарикан федерацияйин директор Аьйшат Аьлиевайи ктибтнийи:

«Учу улихь диврайи метлебарикан саб – жигьилар физический культурайихьна ва спортдихьна, гьяйвниин алди деркку чIимриан йивувалихьна, пягьливанвалихьна, гьацира гьяйвнариинди уйнамиш апIру милли тамширихьна жалб апIувал вуйич. Гьяйвнарин кюмекниинди бицIидарин психикайин жюрбежюр уьзрар сагъ апIузра шулу. Гьяйифки, ухьухь дицисдар бицIидар гизаф а. Гьяйвнариинди яртували дурар сагъ апIуз кюмек тувди».

Дагъустандин гьяйвнарин федерация спортдин милли жюрйир артмиш апIбахъра хьибди. «Гъи Урусатдиъ гьяйвниин алди яракь ишлетмиш апIбан спортдин жюре артмиш апIура. Му милли спортдин жюре Дагъустандиъра артмиш апIбанди вуча. Ихь жигьилар вари Урусатдин дережайиъди талитариъ иштирак шула, амма асас хъуркьувалар адар. Спортдин гьаму жюрейиин машгъул хьуз ккунидариз варидариз теклиф апIураза», – гъапнийи федерацияйин вице-президент Жамал Махтибеговди.

Пресс-конференцияйиъ иштирак гъахьи спортдин туризмдин федерацияйин президент Шарип Муриловди къайд гъапIганси, учв кIулиъ айи тешкилатдин асас месэлйирикан саб – гьяйвнаринна спортдин туризм артмиш апIувал ву.