Китайиъ коронавирусдиан аьзарлу духьнайидарин кьадар артухъ шулайивалихъди аьлакьалу вуди, Дагъустандин «Уйташ» аэропортдиъ, гьюлин портнаъ ва Азербайжандинна Урусатдин сатIи вуйи сяргьятариин санитарвалин ахтармишар гъахувал мюгькам дапIна.
Гьамусяаьт харижи уьлкйириан Урусатдиз гъюрайи инсанар Дагъустандиъ айи Роспотребнадзорин Управ-лениейин пишекрари деврин тIалабариз гъилигу тяминатарин кюмекниинди хатIалу инфекция каш-ктарш ахтармиш апIура.
Улихьна йигъари Мягьячгъалайиъ шагьрин сабпи больницайин бинайиинди яратмиш дапIнайи волонтерарин «Феникс» кIуру гьяракатну коронавирусдиз аькси вуйи профилактикайин акция кIули гъубхну. Акцияйин дахилнаъди волонтерари шагьрин хьудварждиинакьан агьалйириз Урусатдин сагъламвал уьбхбан Министерствойи ватандашариз уьзрикан мялуматар тувбан бадали гьязур дапIнайи кагъзар пай гъапIну, сар инсандикан тмуну инсандикна тарабгъру уьзрикан ктибтну.
Волонтерарин тешкилатдин кIулиъ айи Аида Наврузовайи къайд гъапIганси, уьзур тарабгъувал кьяляхъ йивурадар. Урусатдиъра швнур-сар касдик уьзур кубчIвнайиваликан мялуматар а. Гьаму аьгьвалатнаъ ухьу гьарсари, вирус тарабгъбаз аьксивал улупури, гьюкмин органариз кюмек дапIну ккунду.
Му жюрейин акция Дагъустандиъ сабпи ражари гъубхуб ву.
Дагъустандин сагъламвал уьбхбан Министерствойи ОРВИ, грипп ва гъурдлариз мичIал хьувалин уьзрар тарагъбиин гюзчивал гъабхура. Думу уьзрариан иццру шулайидарин кьадар артухъ гъабхьиш, министерствойиан туврайи мялуматариинди, региондин медицинайин идар-йир, духтрар республикайин агьалйир вахтниинди ва заан ерийин кюмекнахъди тямин апIуз гьязурди а.
