Урусатдин Президент Владимир Путиндин къарарниинди 2016-пи йисан Яракьлу кьувватарин цIийи гъурулуш– Урусатдин Милли гвардия – тешкил апIбиинди ихь уьлкейин хатIасузвал хъана ижми гъабхьну.
Гьюкмин кIулиъ айидарин табшуругъниинди Урусатдин Милли гвардияйи МВД-йихъди сатIиди, сигъ аьлакьайиъди терроризмдихъди ва тешкиллу тахсиркарвалар апIру дестйирихъди аькси женг гъабхура. Милли гвардияйин дестйириъ гъуллугъ гъабхру контрактникар лап ижми тIалабариинди гъядягъюра.
Милли гвардияйин штатдиъ 400 агъзурихьна «гъядягънайи», варитIан дирбаш эскрари гъуллугъ гъабхура. Дурарикан 200 агъзур айтIан кьушмарин вакилар, хъа имбу 150-200 эскер – полицияйин ва хусуси подразделенйирин вакилар ву.
Къайд апIувал лазим вуки, Милли гвардияйиъ ватандин улихь вафалуди гъуллугъ гъабхурайидарин арайиъ хайлин ихь таабсаран баярра а. Дурарикан сар – аьхюнур прапорщик Нариман Сеидов ву.
Нариман Сеидов Табасаран райондин Ккувлигъ гъулаъ бабкан гъахьну. Калининграддиъ дявдинна гьюлин флотдиъ гъуллугъ гъабхурайи вахтна, дугъу контрактдиинди гьадушваъ гъузуз йикьрар йитIуру. Йирхьуд йисан гьадму флотдиъ аьлакьайин частнаъ гъуллугъ гъабхбан кьяляхъ, 2010-пи йисан Нариман МВД-йин айтIан ляхнарин 102-пи жаради вуйи хусуси кьушмарин дестейиз ляхниз гъадагъуру, ва гьаддихъан мина думу гьадушваъ аьлакьайин ишчиди лихура.
«Милли гвардияйин эскрари жара яракьлу кьушмарин дестйирихъди сатIиди уьлкейин хатIасузвал уьбхюра. Гьюкмин заан гъурулушдиз ва жюрбежюр кьувватлу дестйириз: полицияйиз, ОМОН-диз, СОБР-диз, Милли гвардияйин дахилнаъ айи жара хусуси дестйириз гьюкмин ва жямяаьтлугъ низам-къайда уьбхбаъ кюмек тувра, гюзет апIурайи дараматар, хулартеррористарихьан уьрхюра, уьлкейиъ экстремизмдихъди ва терроризмдихъди аькси женг гъабхура», – къайд гъапIну ич гюрюшдиъ Нариман Сеидовди.
Нариманди гъапиганси, му подразделениейин гъуллугъчйириз фунуб-вушра транспорт ахтармиш апIуз, хатIасузвал аш, улихь ккимиди, хабардар дарапIди яракьдиан йивуз, фунур-вушра касдин документариз лигуз, тахсиркарвал апIурайивалин шак’вал гъафи касар дисуз ихтияр а.
«Узу лихурайи отдел аьлакьайин отдел ву. Ич отделиъ лихурайи гъуллугъчйирин асас вазифа: учухьна гъурубкьу чарасуз вуйи хабар вахт-ниинди тялукь подразделенйирихьна ва отделин заан гъуллугънан вакиларихьна рубкьувал ву. Аьлакьйир швнуб-саб жюрейиндар шулу. Мисалназ, радиойин, симарин, спутникдин жюрейин ва гьацдар жарадар.
Бязи вахтари саб суткайин арайиъ хатIасузвал уьбхювалихъди аьлакьалу швнуб-саб хабар гъюри шулучуз. Дурарин арайиъ терроризмдихъди, экстремизмдихъди аьлакьалудариз асас фикир туври шулча. Мисалназ, сад-кьюд йигъ мидиз улихьна Агвалийиъ хусуси метлеб айи операция гъабхурайи йишв’ан боевикарин жини, яракьдихъди ацIнайи блиндажар гъидихъуваликан хабар гъафнийи. Узу думу хабар гъуллугънан заан вуйи ва гюзчивал гъабхурайи отделиз вахтниинди рубкьуз гъитунза. Республикайиъ гизафси УнцIукIул, СтIал Сулейман районариан гьадму жюрейин хатIалу мялуматар, хабрар гъюри шулу. Аьхиримжи вахтари Табасаран ва Хив районариан чIуру хабрар дяргъюрайивали узу лапра рази апIура»,
– ктибтну Нариманди.
Ватан уьбхбан гъуллугънаъ айи вари вакилар улдубчIву, Ватан уьбхрударин Йигъахъди тебрик апIури, Нариман Сеидовди ихь халкьдиз ислягьвал, хушбахтвал, гьич саб вахтнара чIуру хабар деребхьувал ккун гъапIнийи. Хъа жигьилариз ва аргъаж шулайи наслиз Ватан ккун апIбан, ихь ата-бабйирин ватанпервервалин гьиссар ужуз дарапIди уьмур хъапIбан, лазим дару инсанарихъ хъпехъури, Ватандиз, гьюкмин кIулиъ айидариз къаршуди дийийигъбан тек-лиф дивну. Учура дугъан теклифарин тереф уьбхюрача.
