Улихьна йигъари Дагъустан Республикайин районарин арайиъ вуйи Урусатдин налогарин гъуллугънан 4-пи нумрайин инспекцияйин начальник Къурбан Ягь’яевдин жягьтлувалиинди тешкил дапIнайи серенжемдиъ Табасаран райондин Сиртич гъулан мектебдин 76 мялимдиз физический касари налог тувбан хусуси кабинетдин паролар ва логинар тувну.
Хусуси кабинетдин пароль ва логин тувайиз, серенжемдиз дуфнайи 4-пи нумрайин инспекцияйин кIулиъ айирин заместитель Мухтар Ягь’яевди ва гьисабар гъахбанна налог туврайидарихъди ляхин апIбан отделин кIулиъ айи инспектор Ренат Мурадовди мектебдин мялимариз налог тувбан хусуси кабинетдикан ва диди апIурайи ляхникан ктибтнийи. Дурари къайд гъапIганси, хусуси кабинет ачмиш апIбаз лигну, гьарсар касдихьан, чан хулаъ дусну имиди, налогарихъди аьлакьалу вари ляхнар тамам апIуз шулу.
Серенжемдиъ иштирак гъахьи Дагъустандиъ айи УФНС-дин налог туврайидарихъди ляхин гъабхурайи отделин начальникдин заместитель Багьаудин Аьлиевди уч духьнайидариз 2020-пи йисандин декларацияйин кампанияйин дахилнаъди 30-пи апрелиз вари физический касари 2019-пи йисан чпиз гъафи гъазанжар гьюкуматдин гьисабназ тувну ккунивал кIваин гъапIнийи.
КIули гъубшу серенжемдиъ Сиртич гъулан поселениейин глава Аьгьядуллагь Уьсмановра айи. Чан улхбаъ дугъу гъуландари налогар фици тувраш мялумат тувнийи. Дугъан гафариинди, ккудубшу йисан улупнайи план гъулан поселениейин агьалйири айи девлет-хазнайилан налог тувбиинди 132% ва жилин налог 73% тамам гъапIну ва гьаму улупбаринди Табасаран райондиъ айи 22 гъулан поселенйирин арайиъ Сиртич гъул 6-пи йишв’ин ал.
«Эгер ухьу гьарури чаин али налог вахтниинди туври, гьюкуматдин улихь ватандаш’валин буржи ужуди тамам апIури гъахьиш, думу ухьуз ужу ву. Фицики жилилан, айи девлет-хазнайилан, транспортдилан ухьу туву налогарин кьадарназ лигну, гъулан поселениейин бюджетдиз гъафи дакьатари ухьуз ихь гъулан аьтрафар ккабалгуз, инсанариз рягьятвал йивру йишвар ачмиш апIуз артухъси мумкинвалар тувди», – къайд гъапIну поселениейин главайи.
Мялимарихъди вуйи серенжемдин кьяляхъ, Багьаудин Аьлиевди Сиртчарин мектебдиъ заан классариъ урхурайи баяр-шубариз налогдин тарихдикан ва думу фици ва шлиз туври гъахьнуш ва гъийин девриъ гьюкуматдин налог тувбан къайдайикан ктибтнийи. Гюрюшдин аьхириъ мектебдин ученикари УФНС-дин гъуллугъчийиз суалар тувнийи.
