Демирбег Рамазанов 1960-пи йисан 18-пи апрелиъ Табасаран райондиъ Гурихъ гъулаъ бабкан гъахьну. 1980-пи йисан 2-пи майиъ думу Совет армияйин жергйириз гъушну.
Чаз табшурмиш дапIнайи вазифа тамам апIбан бадали, сифте думу Туркменистандиъ айи Краснознаменный дявдин округдиъ Ашхабад шагьриъ афйи сержантарин мектебдиз гьаъру. Сержантвалин курсар ккудукIубси, бицIину сержант кIуру эскервалин ччвурра тувну, Демирбег Рамазанов цIийиди дуфнайи эскрар гьязур апIуз Самарканд шагьриз гьаъру.
– Демирбег Мягьямедович, уву Афгъанистандиз шлихъди гъушунва ва фуну частназди ахъунву?
– Узу, цIийиди дуфнайи эскрар 2 вазлин арайиъ Самарканд шагьриъ гьязур дапIну, дурарра узухъди хъади Афгъанистандиз гъушунза. Мушваъ учу Парван провинцияйиъ Джабаль-Уссарадж кIуру шагьриъ ерлешмиш дубхьнайи 177-пи мотострелковый полкназди ахъунчу. Душваъ узу 9-пи ротайизди гьаънийи. Саб гьяфтайилан ич рота жара йишваз, Саланг дерейиъ айи Кабул-Термез кIуру рякъ уьбхюз гьапIнийи.
– Душмнарихъди дяви апIуб швнубан алабхъунчвуз?
– Душмнарихъди дяви апIуб швнуб-сабан алабхъунчуз. Саб хайлин вахт гъубшган, ич частнаъ айи жара батальонди учу гьюдюхнийи. Узуз аьхюну сержантдин ччвур тувбалан кьяляхъ, мотострелковый дивизияйин командирин заместителди лихури гъахьунза. Душваъ йиз варитIан ужудар дустар, ихь ватанагьлийир – Къужник гъул’ан вуйи М.ТIеибов ва Хив райондиан вуйи З.Къурбанялиев ва жарадар вуйи.
1982-пи йисан январин вазлиъ, учуз душмнарихъди женг гъабхбан бадали, Афгъанистандин гъулариъ учIвну, душвариъ айи вари хулар ахтармиш апIбан буйругъ гъафнийи. Душваъ думуган аьхю дявйир гъахьнийи, хилиъ яракьра амиди, гъулариан 350 душман адаънийча. Гьадмуган дявдиъ гюллйир куркIнайи йиз эскрар ва офицерар женгариан адагъру вахтна, узузра хатIалу зиян гъабхьнийи. Душв’ан узу вертолётдиъди адагънийи ва Кабулиъ айи дявдин госпитализ хьади гъушнийи. Думу снайперин 7,62 калибрин гюлле гарднихъан зинди адабгънийи. Саб гьяфтайилан учу, зийнар духьнайи эскрар, Ташкент шагьриъ айи госпитализ, хъа душваъ йишвар адрувализ лигну, жара госпиталариз гьаънийчу. Узу Ашхабаддиъ айи дявдин госпитализ гъухнийзу. Душваъ 8 вазликьан дахънийза. Гъюргъю кIурбар адагъури, шубуб операция гъапIнийиз.
– Увуз фицдар наградйир авуз?
– 1982-пи йисан 6-пи майиъ душмнарихъди вуйи дявдиъ игитвал улупбаз, душмнарин арайиан эскрар адагъбаз лигну, узу «Уьру Хяд» кIуру ордендихъди, гьацира медаларихъди лишанлу гъапIнийи.
– Гьамус жандин сагъ’вал фици вуяв?
– 1982-пи йисан 10-пи сентябриъ узу йиз багъри Гурихъ гъулаз кьяляхъ гъафунза, Табасаран райондин военкоматдин ихтиярназ. Гъулаз гъафиган, йиз сагъ’вал хъана ужу апIбан бадали, узу дишлади Дагъустан Республикайин сагъламвал уьбхбан Министерствойиз илтIикIнийза. 1986-пи йисан Дербент шагьрин ЦРБ-йин хирургияйин отделениейиъ гьадму гюлле кубкIу зиян кайи йишван 6-пи операция гъапIнийиз. Гьамусяаьт Гурихъ гъулаъ яшамиш шулаза. Узуз хьур бицIир азуз. 1990-пи йисхъан мина Гурихъ гъулан советдиъ военныйна гьисабнан столин начальникди лихураза.
– Демирбег Мягьямедович, Афгъанистандин игитарин машкврихъди мубарак апIури, яв гъюзимбу уьмриъ увуз жандин сагъ’вал ккун апIураза.
