ТIеибов Малляли 1959-пи йисан Табасаран райондин Къужник гъулаъ бабкан гъахьну. 1980-пи йисан 2-пи майиъ дугъаз СССР-рин Яракьлу Кьувватарин жергйириз ДАССР-ин Табасаран райвоенкоматди дих гъапIнийи. Улихьна йигъари узу Малляли Аьбдурягьмановичдихъди гюрюшмиш гъахьнийза ва сюгьбат гъубхнийза. Думу жикъиди исихъ чап апIурача.

 

– Малляли Аьбдурягьманович, армияйиъ уву сабпи ражари фуну йишвазди гьаънийи?

– Учу армияйиъ жюрбежюр йишвариз пай апIру вахтна, узу Туркменияйин Ашхабад шагьриъ айи дявдин округдизди гьаънийи. Душваъ узу артиллерияйин полкнаъ гъахьунза. Йирхьуб вазлин арайиъ отделениейин командирвалин курсариъ урхури гъахьунза. Думу курсар ккудукIбалан кьяляхъ, узуз сержантвалин ччвурра тувнийи.

– Афгъанистандиъ ихь гьюкуматдин армия фицдар метлебар ади апIнийи?

– 1980-пи йисан ноябрин вазлиъ, ухьухъди дуствал айи Афгъанистан гьюкуматдин халкьдиз кюмек апIбан бадали, учу дина гьаънийи. Кабулиъ учу жара апIбалан кьяляхъ, Багьрамдиз, хъа Багьрамдиан Джабаль-Уссарадж кIуру шагьриъ ихь 177-пи мотострелковый полкназ гъушнийча. Душваз гъушубси, узу дишлади частнан штабдиз делопроизводителди гъадагънийи. Гьяфтайиъ саб ражну жини почта хуз Багьрам шагьриъ айи дивизияйиз гъягъюри гъахьунча.

– Душмнарихъди вуйи дявдиъ фицдар женгариъ иштирак гъахьунва?

– 1981-пи йисан 27-пи апрелиъ Чарикар кIуру шагьрин гъвалахъ ич дестейиин душмнар алархьнийи, дурарикан хьур кас йивну гъийихнийи, ич дестейианра 7 кас талаф гъахьнийи. Душваъ узуз аьхю зиян гъабхьнийзуз – арччул ликриан гюлле утIубччвнийиз. Му женгнаъ игитвал улупбаз ва жини документар уьрхбаз «Кьягьялвализ лигну» медаль тувунзуз. Гьацира саб хайлин юбилейин медаларра азуз.

– Афгъандин кьяляхъ наан лихури гъахьунва?

– 1982-пи йисан майин вазлихъан мина Табасаран райондин Къужникарин гъулаъ ккергъбан классарин мялимди лихури гъахьунза, хъа 1999-пи йисхъан мина гъийин йигъазкьан душваъ директорин за-местителди лихураза.

– Малляли Аьбдурягьманович, чухсагъул. Ярхи уьмур тувривуз.