Гьар йисан 15-пи февралиъ ихь уьлкейиъ Афгъанистандиъ интернационалвалин буржи тамам гъапIу эскрарин гьюрмат уьбхру Йигъ къайд апIуру, фицики 1989-пи йисан гьаму йигъан Советарин кьушмарин аьхиримжи десте афгъанаринна ихь уьлкейин сатIи вуйи сяргьятарилан минди улдубчIвну. Афгъанистандин дявди ихь ватанагьлийирин юкIвариъ, кьисматариъ сагъ дубхьну ккудудубкIру зиян гъибтну.

 

Политикайин гьякьнаан улхуруш, Афгъанистандин дявди ихь улкейиз хъуркьувалар гъахундар, аьксина, СССР-рин аваза асккан гъапIну, арайиз гъафи кризисди уьлке дабгъувалихьна гъюз гъитну. Дяви саки 10 йисанкьан давам гъабхьнийи. Советарин армияйин 15 агъзуриинакьан эскрар йивну гъийихнийи, зийнар гъахьидарин кьадар 50 агъзуриинакьан удубчIвнийи. Гьадрарин арайиъ хайлин табасаран баярра ади гъахьну. Дявдин натижйириз дилигди, думу дявдин иштиракчйир ихь арайиъ игитар вуди гъузра. Дурари чпин ватанпервервал улупну, Ватандин улихь чпин буржи тамам гъапIну.

Гьаму йигъари республикайин образованиейин, жигьиларин политикайин ва культурайин вари идарйириъ думу дявдин женгарин иштиракчйирихъди гюрюшар кIули гъахура, Афгъандин дявдин гьякьнаан сюгьбатар апIбан бадали, жюрбежюр серенжемар тешкил апIура. 1989-пи йисан 15-пи февралиъ.

Аьдат вуйиганси, Ватандихьан ярхлаъ чпин гъуллугънан буржи тамам гъапIу эскрарин гьюрматназ Мягьячгъалайиъ интернационалист эскрарин паркдиъ, Афгъанистандиан Советарин кьушмар адаъну 31 йис тамам хьувал къайд апIури, митинг кIули гъябгъиди.

Серенжемдиъ дявдин женгарин ветеранар, Дагъустан Республикайин гьюкмин ляхин кIулиз адабгъру органарин вакилар, жямяаьтлугъ ва ветеранарин тешкилатарин вакилар, йивну гъийиху эскрарин багахьлуйир иштирак хьиди.

Митингдин дахилнаъди интернационалвалин буржи тамам гъапIу эскрариз дивнайи ядигарихъ кюкйир дивди.