Наргиз Гюлечова

2024-пи йисан ноябрин аьхирариъ Новолак райондин аьтрафариин микIрахъди либхру электростанция яратмиш апIура кIури, махлукьатлу хабрарин дакьатари мялумат тувнийи.

Думуган, Урусатдин экономикайин министрин заместитель Сергей Назаровдин, Дагъустандин Глава Сергей Меликовдин ва «Росатом. Возобновляемая энергия» АО-йин вакиларин иштираквал ади, кIули гъубшу элекстростанцияйин шибритI ипбан серенжемдиъ 300 мегаватт кьувват айи электростанция дивбан тикилиш’валин ляхнар 2026-пи йисан ккудукIбакан гъапнийи.
Магьа гьаддихъанмина гьеле кьюб вазкьан дубшну адашра, электроэнергия тартиб апIру микIлахъди илтIикIру сабпи алат дивна. Дидин ягълишин 150 метр ву, му 45 мербетайин хуларин ягълишназ барабар шула. Дидин гъагъишнан кьадар 7,5 тонна, хъа дивнайи жилин кьадар 50 квадратный метркьан ву.

Дагъустандин электроэнергияйинна тарифарин министерствойиан тувнайи мялуматариинди, мурар микIлахъди илтIикIру кюлер гьязур апIру Ульяновскдин заводдиъ гьясил гъапIдар ву. Новолакдин микIлан электростанция диврайи жилариин микIлахъди илтIикIури электроэнергия гьясил апIру 120 алат гъурулуш дивди.
Зиихъ къайд гъапIганси, микIлахъди либхру электростанцияйин тикилиш’валин ляхнар 2026-пи йисан аьхирихъна гъиди. Мушваъ диврайи, микIлахъди илтIикIури электроэнергия гьясил апIру 120 алатдикан, цци 152,5 мегаватт кьувват айи 61 алат, хъа гъюру йисан 147,5 мегаватт кьувват айи имбу 59 алат дивну, электростанция ляхник кипди.
Пуб лазим вуки, гьамусяаьт тикилиш’валин ляхнар гъягъюри имиди, мушваъ 300 касдиз лихру йишвар ачмиш дапIна. Хъа элетростанция либхуз хъюбгъхъан, 70 пишекар гьаммишан лихру йишварихъди тямин апIуз планламиш дапIна.