Ухьуз мялум вуйиганси, ихь республикайиъ гьар йисан февралин вазлиъ мектебариъ, бицIидарин багъариъ, библиотекайин ва культурайин хулариъ вари халкьарин бабан чIалнан Йигъ ва гьяфта къаршуламиш апIури шулу.
Бабан чIалнан Йигъахъди ва гьяфтайихъди аьлакьалу вуди шиърар урхбан, цалин газатар адагъбан, ачухъ дарсар тешкил апIбан, урхурайидар цIийиди чапдиан адагънайи китабарихъди таниш апIбан, баяр-шубарин арайиъ сочиненйир дикIбан ва гьацира саб жерге жара конкурсар гъахувал, гъирагъдилан чIал, халкьдин культура бадали ликар алдагъурайи касариз дих апIури, дурарихъди урхурайидари ва мялимари сюгьбатар апIувал Мажвгларин кьялан мектебдиъ аьдат дубхьна.
Нубатнан ражари учу мициб серенжем гъийин деврин литературайин шаирар вуйи Керим Маллаевдихъди ва Кюребег Мурсаловдихъди кIули гъубхнийча.
Серенжем абццри, мектебдин администрацияйин терефнаан сифтейин гаф мектебдин директорин тербия тувбан ляхин гъабхурайи заместитель, бабан чIалнан ва литературайин мялим Мейлан Нежефовди гъапнийи. Дугъу йигълан-йигъаз урхбахьна иштагь дубгурайи баяр-шубариз мицисдар серенжемар чарасуз лазим вуйивал ва хяларди дуфнайи шаирари, халкьдин арайиан чIалнан ирс ва гьенг дубгуз гъидритри, зигурайи зегьмет къайд гъапIнийи.
Мярака давам апIури, урхурайидари шаирарин уьмрарикан, яратмиш`валин рякъярикан ктибт-нийи ва дурарин эсерар кIваъланди гъурхнийи. Хъасин гьюрматлу шаирариз гаф тувнийи.
Керим Маллаев ва Кюребег Мурсалов чпин бикIбарикан, ярат-миш`валин рякъюъ алахьурайи читинваларикан, ккудушу йисари чапдиан удучIвнайи чпин китабарикан гъулхнийи. Дупну ккундуки, ихь кьюрид шаираринра гьаму йигъари чапдиан удучIвнайи цIийи китабарин – Кюребег Мурсаловдин «Алдабхъу шалвар», Керим Маллаевдин «ГукIни кIажар» – презентацияра заан дережайиъди кIули гъубшну.
Шаирари къайд гъапIганси, яратмиш`валин рякъюъ алабхъурайиб саб читинвал ву. Улихьган саб шиир гъибикIган, гонорар тувуйи, урхурайидарихьан эсериз кьимат айи. Хъа гъи, кIул`инди вуйи саб китаб чапдиан адабгъуз жвуван жибдиан ляхнин маважибдин кьадар пул гъябгъюра. Гьаци вушра, дурарик кайи асас гъалабулугъ`вал ва дерд гъи китаб урхуз иштагь адру касарикан вуйи.
Шаирарси, Ляхлаарин кьялан мектебдиъ лихурайи мялимарра вуйивализ лигну, дурари кьюриддира урхбахьна аьшкь, иштагь айи ва гьацира думу дубгурайи урхурайидарикан – гьар йигъан чпи шагьидар шулайи аьгьвалатнакан – гъапнийи.
Урхурайидарин ва мялимарин тIалабниинди, Керим Маллаевди чав ТОКС-диъ гъабхурайи ляхниканра кьатI’иди ктибтнийи.
Гьацира уч духьнайидари Кюребег Мурсаловдин пьесайиан ихь табасаран драмтеатри сягьнайиин дивнайи Малла Несрединдикан вуйи кьатIназ ва Керим Маллаевдин гафариз вуйи мяълийириз кьимат тувнийи.
Серенжем аьхирихъна гъюри, шаирари чпин китабар мектебдин библиотекайиз ва кIубанди шиърар гъурху баяр-шубариз багъиш гъапIнийи.
Мектебдин администрацияйин терефнаан чухсагъул мялум апIбан гьюрматнан кагъзар ва пешкешар туври, шаирарихьна мектебдин мялимар В. Важибов, М. Аьлескеров, Ш. Мягьямедбегов илтIикIнийи.
Дурари гъапи гафар текрар апIури, ихь шаирариз жандин мюгькам сагъ`вал, хизандиъ гьар йигъ акуб хьувал, ляхниъ ва яратмиш`валин рякъюъ хъуркьувалар ккун апIурхьа.
