Улихьна йигъари РД-йин тикилишчивалинна архитектурайин ва ЖКХ-йин Министерствойин совещанйир гъахру залиъ Дагъустандин хал-йишварин месэлйириз лигру гьюкуматдин инспекцияйин 2019-пи йисан гъапIу ляхнарин натижйириз ва 2020-пи йисандин планариз бахш дапIнайи совещание кIули гъубшну.
Совещаниейиъ РД-йин Правительствойин председателин заместитель Владимир Лемешко, РД-йин тикилишчивалинна архитектурайин ва ЖКХ-йин министр Малик Баглиев, РД-йин Халкьдин Собраниейин депутатар, ЖКХ-йин идара апIру компанйирин кIулиъ айидар ва хайлин жара касар иштирак гъахьну.
Серенжемдиз уч духьнайидарин улихьна удучIвну, республикайин хал-йишварин месэлйириз лигру гьюкуматдин кIулин инспектор Аьли Жабраиловди инспекцияйин ляхнин 2019-пи йисандин натижйирикан ва 2020-пи йисандин планарикан вуйи аьхю доклад гъурхнийи.
Докладдиъ дугъу мялум гъапIганси, гъубшу йисандин арайиъ республикайин ЖКХ-йин цирклиъ хал-йишварин месэлйириз лигру инспекторари 4248 тахсикарвалар ашкар гъапIну. Аьли Жабраиловдин гафариинди, сач ляхниъ айи камивалар арайиан адагъуб тIалаб апIурайи 9219 документ гьязур гъапIну. Гьадрарин дахилнаъди – 5255 ахтармиш апIбан актар, 1165 протоколарна 2799 амур апIбар. Улупнайи кьадар документариинди тахсир кайи вари касарин 13 миллионтIан артухъ административ журум гъапIну.
«Агьалйир коммуналин гъуллугъарихъди тямин дапIнайиваликан улхуруш, гъубшу йисан гьаму месэлйирин гьякьнаан инспекцияйиз 4808 аьрза кагъзарикди ва 3213 телефондиан зенг апIбиинди гъафну. Му кьадар 2018-пи йисантIан 647 аьрзайиинди артухъ ву. Яна, пуз шулуки, йислан-йисаз коммуналин гъуллугъарин месэлйирихъди аьалакьалу вуйи агьалйирин аьрзйирин кьадар артухъ шула.
Асас вуди гъюрайи аьрзйир кьюрдун вахтна хулаз деебтурайи манишин вахт-вахтарик цIиб апIбакан, электроэнергия ктIубшвурайиваликан, гьапIрудар вуш мялум дару жюрбежюр буржар илитIурайиваликан ва гьацдар жарадар ву. Учу, думу аьрзйириз шлубкьан ухди дилигну, дурар гьял апIуз чалишмиш шулача», – гъапну Аьли Жабраиловди.
Серенжемдин аьхириъ ляхин ужуди тамам гъапIу ЖКХ-йин управленйирин кIулиъ айидариз, инспекцияйин вакилариз гьюрматнан грамотйир тувнийи.
