КIВАЗ ККУНИ РИШ
Абумуслим Жяфаров
КIваз ккуни риш, багахьна гъач, багахьна,
Ярхлариан михъилиган нач кади.
Жигьил уьмрин чирагъ шад вуди кабхьна,
Ихь кьюреддин бахтниин гьяйран вуди.
КIваз ккуни риш, йиз багахьна кьан мапIан,
Ихь шад сесер дагълариан атIахьри,
Йиз кIваъ айи ширин хиял, ширин кьаст
Узу кIурза, хъебехъ, явра кIваз ерхьри.
КIваз ккуни риш, гьяркат апIин узухьна;
Ухьуз уьмриъ гъам-хажалат дарибшри.
Узуз яв юкIв гьарган йиз кIван багахьна
Дуфну ккунду, багахьна гъач, аьзиз риш.
КIваз ккуни риш, багахьна гъач, багахьна,
Ярхлариан михъилиган нач кади.
Жигьил уьмрин чирагъ шад вуди кабхьна,
Ихь кьюреддин бахтниин гьяйран вуди.
Я РИШ, УВУ НАЪНАН ВУВА
Я риш, уву наънан вува,
Фуну багъдин йимиш вува?
Узук ву гаф капIундашра,
Йиз кIваз уву масан вува.
Яв кIулихъай келегъайик
Яваш хьару лепе ккипра.
Ургур шуран кьялаъ айи
Сари йиз кIваъ гьарай ипра.
Гьар гвачIинган, гьар хябяхъган
Йиз улари ву агуру.
Лизи келагъа гъябкъиган,
Шадвали йиз юкIв балгуру.
Я риш, уву наънан вува,
Фуну багъдин йимиш вува?
Узук ву гаф капIундашра,
Йиз кIваз уву масан вува.
МЮГЬЮББАТДИН ШАРАБ
Ибрагьим Шагьмарданов
Сан нимкIукди узу вухъди гъахьунза,
Ширин-ширин сюгьбат вухъди гъапIунза.
Яв багъдиан ширинар зуз тувунва –
Мюгьюббатдин шараб увхьан гъубхъунза.
Йишвну дахну нимкI адарзуз архаин,
Шад бюлбюлси гьарган шулва йиз хил’ин.
Гагь узухьна кунцI тувурва кюкйирин –
Мюгьюббатдин шараб увхьан гъубхъунза.
Мюгьюббатдин йисир вуза зу увуз.
Йиз уьмрин ригъ уву вува, яр, узуз.
Уву адру женнет багъра ккундарзуз –
Мюгьюббатдин шараб увхьан гъубхъунза.
Яв ккунивал кIваъ абхънайиз дагъларси,
Яв улари акв тувра зуз ригъдиси,
ТIавус къушра гюрчегуб дар увуси –
Мюгьюббатдин шараб увхъан гъубхъунза.
ЯР ГЪАФУНДАР
Дийигъназа ккилигури,
Гъюру рякъ ули уьбхюри,
Гъюрза дупну гаф тувнайи,
Алагюзли яр гъафундар.
Ригъра дуфна завун кьялаз,
Фукьан лигуза зу ярхлаз,
Кьара гъюри адариз кIваз:
Алагюзли яр гъафундар.
Магьа багъдиз дуфна жакьвар,
AпIypи шад ширин мукьмар.
Вари дуфна, cap дуфнадар –
Алагюзли яр гъафундар.
Мархьра гъубгъну, ригъра гъапIну,
Гъар жюре кюкйир адашвну.
Вари гъахьну, вари гъафну.
Аллагюзли яр гъафундар.
КIваз гъюри адариз кьарай,
Ничхриси апIурза гьарай,
Дагълариъ ай жейрандин тай
Алагюзли яр гъафундар.
Эллер гъафну, селлер гъафну.
Йиз улариз ишуб гъафну.
Учв гъафундар – кагъаз гъафну —
Алагюзли яр гъафундар.
БАБАН ХИЛАР
Агъакерим Агъададашев
(«Бабан хилар» кIуру поэмайин саб чIукI)
Йигъан туври мухрилан никк,
КитIну шинтак, ккипра цIилар,
ЦIиин дубжну хямрикан ккикк,
Гьивдар гъахьну бабан хилар.
ХутIлиъ хъубкьган дяхнин иган,
Дагьри дубгну гъапIу шилар.
Жукук кивдар муччвур-диган
Сифте гъахьну бабан хилар.
Гьарган дапIну чав беслемиш,
Аьхю гъапIну бицIи баяр.
Швушв духну, вари эвлемиш
ГъапIдар гъахьну бабан хилар.
ЦIа кубкIси завун дифарик,
Уьрхюз гьаъну шагьрар, гъулар.
Гъягъру вахтна ихь йирфарик
Кучдар гъахьну бабан хилар.
Иблисдихьан уьбхюз Ватан
Гъушган вари баяр, жилар,
Ляхин апIуз хулан, чIатан
Хъиржвну гъахьну бабан хилар.
Бабхьан Ватан шулдар жара,
Дурар саб кIул, сабсан иб ву.
Рубкьан гъивуз адар ара,
Дурар саб йикк, сабсан шиб ву.
Дустар апIуз вари эллер,
ЗапIна гьарган бабан хилар.
Ихь уларлан шаду селлер
Гьаъдар гъахьну бабан хилар.
БАБ КЬАБИ ШУЛА
М.Гьябибулаев
Уларикк баб шула кьаби,
Вахтназ шула думу табигъ,
Байвахтнаси дугъан дих «жан»
Ебхьури, вуза лап уткан.
Кьабивализ йиз багъри баб
МичIал хлинццари гъахура.
Абг, табиаьт, дердназ сабаб,
Миж кади баб вуз лигура…
Улхбаъ ришси вушра дири,
Ва сагъди вушра юкIв дугъри,
Дигиш духьна марцци рангар,
Жигьилвалин ччвуртIан имдар.
Фу гъабхьну йиз аьзиз бабаз?
Мукьан ухди шулин кьаби?
Гъубшну уьмур – ухшар хядраз,
ГвачIни шлу йигъаз табигъ.
… КкунийкIан бабан бахтлу ччвур
Балгуз, духьну худлар ягъчIвур.
Ва дурариз – рякъ ягъурлуб,
Ригъдин нурнакк гьарган акуб.
БАБАРИЗ
Шамиль Къазиев
Хурчва гьарсаб юкIв му аку дюн’яйиз.
Тувну уж’вал, ихтибарвал, ккунивал.
Йипай, бабар, гьаз сасдар ичв баяриз
Уьмрин гьацIаз гьубкIурдар кIван марццивал?
Аьгъю шулу тум алабхьурайириз,
Чвну хутIли фициб мягьсул тувруш чаз.
Йипай, бабар, ичв баярин юкIвариъ
Гъубзу вари уж’влин тум кудубчIвдар гьаз?
Гьарган унчIв’ан лигуручва рякъяриз,
Гьисс апIури бализ гъюру дерд-бала.
Йипай, бабар, гьаз сасдар ичв баяриз
Рякъюрдар ичв лизи шулайи кIулар?
Йипай, гьаз аннамиш апIдар дурари
Учву миди ичв уьмрин дерднан кьисмат?
Йипай, бабар, накьвдихъ балин ишбари
Бабан дахабгнайи кIваз тувруш рягьят?
БАБ
Юсуф Базутаев
Суфрайихъна уч апIурва яв хизан,
Хурва цIикаб, чIукIар дапIну, улихьна.
Гьаз, йипа, баб, гьяркат кади хил гьарган
ГьачIабккуруш вартIан бицIи чIукIрахьна?
Эгер сардик кади гъабхьиш дерд ухькан,
Дерд арайиз адабгъурхьа цIикабси.
Кьаби баб, гьаз вартIан аьхю чIукI дерднан
Гъадабгъуз яв гьяркат шулуш, йип аган?
ПАГЬ, АДАЙНУЗ ХУБ УТКАНВАЛ!
Шихмягьямед Гьямидов
Пагь, адайнуз хуб утканвал,
Мяъракайиъ деънайиган.
Кьабул дубхьну яв заанвал,
Мяъли бикIуз хъюгъза увкан.
***
Жан йиз абур, жан такабур,
ГьапIуз гъушва ухди узхьан.
Имдар узуз сарун сабур –
Фагьум-фикир вуйиз увкан.
***
Бейкуф вуза гьамус увухъ,
Адар апIрур гъи йиз язухъ.
Гъушва узхьан хабарсузди,
Узу гъитну хулаъ сарди.
***
Гьар гвачIнинган кIуйва узуз –
Хяви нивкIар сан гъяркъунзуз.
Яваш апIуз дерди-суза,
Уву гьарган ккарцри шуйза.
***
Алдагъ кIуйва увлан хабар,
Гьархруганси гъяркъю нивкIар.
Ваъ кIурдайза узура зат –
Хабахъ шуйва – ригъ Гюлейбат.
***
Хъуркьну магьан вари нивкIар –
Увуз кьисмат гъахьну накьвар.
Гъитну узуз дерд-хажалат,
Узхьан гъушва – нур Гюлейбат.
***
Дерд-хажалат гъитну узуз,
Гъушва узхьан, йиз такабур.
Сарун уьмур зат ккундарзуз,
Дярябкъруган му яв абур.
УВУ — ДАДА, УЗУ — ЯВ БАЙ…
Пирмягьямед Асланов
Багъишламиш апIин, дада,.. Гъи узуз
Яв гафари ижми тясир aпIypa.
Чпин гьунар гьамус аьгъю гъабхьунзуз,
Дурари йиз фагьум русвагь aпIypa.
Узуз текрар апIуйва, баб, думуган:
Вахтнан велед, вахтнан вакил йихь, аьзиз.
Дидихъди тенг ва албагну гъуз гьарган,
Вафасузди милиган му дюн’яйиз.
Ижми дикъат тутрувди яв гафариз,
Увуз йиз ахмакьвали икрагь гъапIну.
Фикир туври ярхлаан вуй дихариз,
Швнубан яв ихтилат зу кьатI гъапIну.
Гагь гьялакди вуйза улихь гьутIурччвуз,
Надинж дайси, кьара дяргъюрай лижягъ,
Гагь явашди – уьмрин гамар алдагъуз,
Гагь хъергуйза шаклуди вахтнан кьяляхъ.
…Диф гъяйиси хашри духьна йиз улар,
Улдугу рякъяриъ гъи алдакураза.
Кьанди зуз, баб, кIваин шула яв гафар,
Файдасузди яв дихнахъ лицураза.
