Сагъ’валихъ хъубкьруб дюн’яйиъ фукIа адар. Инсан жандихъ мягьрум даришри, имбу ляхнар вари кIулиз адагъуз шлудар ву. Сагъу велед гьарсаб хизандин шадвал ва бахт ву. Амма, гьяйифки, саб жерге абйир-бабариз, майиф бицIир хьувалихъди аьлакьалу вуди, чпин уьмур дигиш апIувал алабхъуру.
Гьарган уларикк майиф бицIир рякъюри, дугъаз жвувхьан саб жюрейинра кюмек апIуз даршули хьувалтIан аьхю гъулайсузвал гьич шулин? Ав, мицир велед бабаз аьхю гъагъ ва гуж ву.
Гьаму улихьнаси Дагъ.Огни шагьриъ дуланмиш шулайи Шихгьяфизоварин хизандихъди таниш гъахьнийза. Узуз гьаму хизандикан ва душваъ дуланмиш шулайи майиф кас Фикрет Шихмягьямедовичдикан, дугъу апIурайи игит ляхнарикан хайлин деебхьнайзуз. Гьаддиз узу Фикретдикан гюрюшмиш хьуб ккун гъапIнийза.
Фикрет Шихгьяфизовдин абурлу ляхнарихъди ва дугъан ужудар кьастарихъди газат урхурайидарра таниш апIуз ккундузуз.
– Фикрет, жикъиди яв хизандикан ктибтуб ва уву апIурайи ляхнар фици кIулиз адагъураш, учуз хабар тувуб ккун апIураза.
– Узуз албагу аьхю хизан айиз. Йиз дада Гюльпери Агъаевнайиз узура кади шубур байна юкьур риш а. Чйир вари чпин хизанарихъди дуланмиш шула, хъа чвйири кьюриддира Яракьлу кьувватариъ гъуллугъ апIура. Хъа адаш Шихмягьямед Шихмягьямедович кечмиш гъахьнийич. Гъи узу апIурайи ляхин, узусдар майиф касариз гьюкуматдин терефнаан рубкьурайи кюмек тувувал ккун апIури, кIули гъабхурайиб вуйиз. Мисалназ, узуз йиз хизанди, чвйир-чйири кюмек апIурайиз, лигурайиз, амма гьацдар майиф касар аки, дурариз я чпин хизанарикан, я гьюкуматдикан кюмек адар. Гъи, йиз мицдар кьастар-фикрариз аьхю дикъат тувну, Огни шагьриъ дуланмиш шулайи Рамис Исамудиновичди ва Г. Агъабеговди узуз кюмек апIуз хъюгъну.
Гьамусяаьт Дагъ.Огни шагьриъ кьюд агъзур майиф касар а, ва гьамрарин вари месэлйир гьаму шубур касди гьял апIурача. Сасдар месэлйир гьял апIуз читиндира алабхъурачуз, хъа лап читин месэлйир гъахьиш, Дербент шагьрин прокурорин кюмекчи Тельман Кюрабеговди дурар гьял апIуз кюмек туврачуз. Дугъазра аьхю чухсагъул пуз ккундузуз, дугъура чахьан шлуб вари апIура.
– Ичв ляхниъ асас вуди фицдар месэлйир гьял апIувал алабхъурачвуз?
– Магьа гьаму улихьнаси сар майиф касдиз гьюкуматдин терефнаан коляска тувувал ккун дапIну, думу ляхин кIулиз адабгъунча. Лазим вуйи дармнарин кьитвал айи дюшюшар шулу, саспиган гъадабгъурайи пенсия анжагъ дармнаризтIан гьубкIудар. Хъа имбу месэл-йир фици гьял апIуруш фикир дапIну, учу спонсорар дагну, дурарикан кюмек тувуб ккун апIурача. Гизаф инсанари кюмекнан хил гьачIабккури шулу. Гьацир сар касдиканра кьюб гаф пидиза. Ильмар Къазиев алверчи ву. Дугъу чахьан шлубдиз саб вахтнара «ваъ» кIурдар ва гизафдариз кюмекар гъапIну. Гъи шагьрин администрация-йин улихь сабсана месэла гьял апIуз теклиф дивнайич – учу яшамиш шулайи мягьлайиъ асфальт улубзувал. Иншаллагь, дидиз фикир тувди ва багарихьди му месэла гьял апIиди кIури, умуд кивраза.
Фикрет Шихгьяфизовдиз, ухьузси, сагъ’вал айиш, дугъу хайлин жара ляхнарра апIуй кIури, фикир вуйиз. Асас вуди ухьу, инсан майиф ву дупну, дугъаз гизаф фикир туври шулдархьа, амма магьа Фикретди, учв хулаъ деънашра, гъийин ихь насларин ва гележегдин гъайгъушнаъ учIвну, жвуван кьувватар инсанариз уж’вал апIуз сарф апIура. Фикретдиз хъуркьувалар, жандин сагъ’вал, чан хиялар, фикрар, умудар кIулиз удучIвувал ккун апIураза.
Шиклиъ: Фикрет Шихгья-физов чан ляхнин гъарашугъарихъди ва кюмекчйирихъди.
