Табасаран райондин Акъа ва Гьесихъ гъуларин арайиъ айи рякъ цIийи алапIура, ва 2020-пи йисан ноябрин вазлиъ думу рякъ гьяракатнаъ ипбанди ву. 11-пи мартдиъ узу Акъа гъулахъ хъайи аьхю гъядхъан тина Гьесихъ гъулаз рякъ апIурайи участокдин начальник, Мягьячгъалайиъ айи «Дорстройтех» ООО-йиан дуфнайи Хизри Гьябибовдихъди гюрюшмиш гъахьунза ва дугъкан йиз суалариз жаваб тувуб ккун гъапIунза.
– Хизри Аьбдурягьманович, учву швнуб километр рякъ апIбанди вучва ва, гьаму рякъ апIбан бадали, фукьан пул жара дапIна?
– Проектдиинди учу 6 километр манзилнаъ рякъ 9 вазлин арайиъ, ноябрин аьхириз, ккудубкIбанди вуча. Му рякъ апIбан бадали, федералин бюджетдиан 54 миллион манат жара дапIна. Рякъ учу цIийи технологияйиинди гьязур апIбанди вуча, лазим вуйи цIийи техникара ачуз. Магьа гъи мушв’ин 5 цIийи экскаваторар, Т-150 бульдозер, 3 куб гъябгъру, гъагъ абхьру техника, «Воmаg» кIуру немцарин рякъяр цIалцIам апIру машин, грейдер, техника гъабхру 3 трейлер, аьхю КамАЗар ва гьацира жара техника либхура. Вари техникайихъ хъайи касарихь рацияра хьа. Чпихь хьайи техникайиз дурари, ягъ ктатури, ужуб гъуллугъра апIура.
– Вари хъайи-хъайиганси апIуруш, мушваъ гизаф ляхин а. Расвалин ляхнарилан савайи, сарун фу апIбанди вучва?
– Му ляхин кIулиз адабгъбан бадали, сабпи нубатнаъ 215 гьар алдатIну ккунду. Дидлан савайи, 13 турба, гьацира 0,5 метр, 0,75 метр ва 1 метр диаметр айи бетондин ппулар, 319 бетондин шибар ккирчну ккунду, 340 ишарйир кайи рякъюн бицIи шалмнар, 137 рякъярихъ хъайи лишнар дивну, 1 километрна 900 метр дренаждин лотокар (архар) ккирчну ккунду. Рякъюн яркьушин йирхьуб метр хьибди, 16 сантиметр ацIушин ади дид’ин гъумна жвилли кIекIел алабхьиди. Рякъюн гъирагъарихъди шид гъябгъру архарра апIиди.
Рякъяриин гьацира хатIасузвал уьбхбахьна дих апIру ишарйир, йишвандин вахтна хатIасузвал уьбхюз кюмек тувру лишнарра хьиди. Лап уз машар кайи йишвар ис апIурача. Рякъ апIруган, гъулариъ айи саб хайлин жигьиларизра ляхнар хьиди – хилихъди апIру ляхнар. Яшамиш хьуз учузра ужуди йишвар албагна.
– Хизри Аьбдурягьма-нович, ниятар кIулиз удубчIврийичв.
