Табасаран райондиъ тяди гьял дапIну ккуни месэлйирикан асасуб вуди штун месэла дийибгъна. «Марцци шид» кIуру федералин программайин дахилнаъди «Къужник – Хючна» штун гъурулуш тикмиш апIбан бадали, 2019-пи йисан 20-пи ноябриъ Табасаран райондин «СЕЗ» (Саб вуйи заказчикдин гъуллугъ) МКУ-йи подрядчикди тяйин дапIнайи, машинар гъягъру рякъяр тикмиш апIру «НЕМА» ООО-йихъди йикьрар дапIна.
2020-пи йисан мартдин вазлиъ му программайин сабпи пайнаъ улупнайи ляхнар гьял дапIну ккудукIиди. Ич сюгьбатнаъ «СЕЗ» МКУ-йин директор Аьбдуллагь Мягьямедовди узуз чпи гъабхурайи ляхникан хъайи-хъайиси ктибтнийи.
– Аьбдуллагь Рамазанович, Табасаран райондиз шид зигувал фициб дережайихъна дуфна?
– ЦIийи штун гъурулушдиъди шид гьаму гъулариз зигиди: Хючна, Хюрикк, Хянягъ, Ругуж, ЦIанитIил, Пилигъ. Турбйир ккивуз Къужникарин табиаьтдин гъядхьан шубуб километр зинаси, «Хянягъ чай» нирин заан кIакIнаан ккебгъиди. Хъа шид зигру манзил 23,6 километр ву. Му шид зигуз вари 71 053 000 манат жара дапIна, гьадму гьисабнаан 70 171 580 манат – федералин бюджетдиан, 709 420 манат – республикайин ва 172 000 манат – муниципалин бюджетариан. Штун турбйир юкьуб советдин – Къужникарин, Хюрккарин, Гурхъарин ва Хючнаарин – жиларилан тина зигиди.
Шид зигуз ПВХ-йин лап ацIу турбйир духна, штун гужназ дурум тувбан бадали, дурар зиълан сабсан аьлава жар алидар ву. Дупну ккундуки, шид зигруган, жюрбежюр диаметрин турбйир ишлетмиш апIиди: искIулиъди сабпи 5 километрин манзилнаъ Ф-280 мм али турбйир, хъасин 7 километриъ Ф-225 турбйир, 4 километриъ Ф-160 ва дилин исинди аьхиризкьан Ф-76 турбйир. Му турбйирин айитI айи штун ахмиш хьувал саб секунддиъ 9 литр ву.
Шид йирхьуб вазлин арайиъ дизигну ккудубкIуз планламиш дапIна. Гьарсаб гъулан зиихъ шид марцц апIру тикилишарра дивди, хъа Хючнаъ – кьюб тикилиш. Улуз ва ЦIанитIил гъуларин арайиъ айи нирлан тина илдандин тIилариинди вуйи гъядра илипна.
– «Марцци шид» кIуру программайин кьюбпи пайнаъ фицдар ляхнар гъахбанди ву?
– «Марцци шид» кIуру программайин кьюбпи пай уьмриз кечирмиш апIури, гьарсаб гъулаъ 150 тонна шид гъябгъру резервуарар дивди. Гъуларин айитIра турбйир зигиди. Гьамусяаьт, программайин кьюбпи пайнаъ улупнайи месэлйир гьял апIбан бадали, тялукь документар гьязур апIура, федералин, республикайин ва райондин бюджетариан лазим вуйи кьадарнаъди дакьатарра деетна.
– Аьбдуллагь Рамазанович, учву апIурайи халкьдиз хайирлу ва сабаб кайи ляхниъ хъуркьувалар ишричвуз.
