Мялим… Му гафнаъ фукьан аьхю мяна адаринхъа! Мялимвал гьарсаб девриъ жигьилариз ужуб тербия ва аьгъювалар тувбаъ жавабдар пишйирикан саб ву. Мялимди жигьил наслин уьмрин рякъ ккабалгуру. Гьеле Конфуцийди гъапну: «Абйир-бабариз узуз уьмур тувбиинди, хъа мялимдиз – яшамиш хьуз рякъ ккивбиинди буржлу вуза».
Жямяаьтлугъдин арайиъ фицдар дигиш’валар гъахьишра, мялимдин ляхнин жавабдарвал ис шулдар. Дугъан зегьметнан натижайиъ мектебдиан ужуб тербия хъайи, заан аьгъювалар айи урхурайидар удучIвуру. Жигьил наслиз ужудар аьгъювалар ва тербия тувбаз чпин уьмур гьяйиф дарапIди зегьмет гъизигу ва зигурайи мялимарикан сар Аьбдусалам Аслановра ву.
Аьбдусалам Асланов 1950-пи йисан 13-пи мартдиъ Табасаран райондин Цухдигъ гъулаъ нежбрин хизандиъ бабкан гъахьну. 1965-пи йисан багъри гъулан мектебдиъ 8-пи класс ккудубкIну, Аьбдусалам Дербентдин педучилищейик урхуз кучIвру ва 1969-пи йисан жигьили думу заан аьгъювалариинди ккудубкIуру.
1969-1971-пи йисари Совет Армияйиъ эскервалин гъуллугъ тамам апIбан кьяляхъ, сифте Хючнаарин, хъасин Курккарин кьялан мектебариъ мялимди лихури, дугъу заочно вуди Ставрополин пединститутдин тарихнанна филологияйин факультетдиъра урхуру. Хъа 1982-пи йислан мина Аьбдусалам Мягьямедович Цухдигъарин кьялан мектебдиъ тарихнан дарсар кивру мялимди лихура.
Думу образованиейин цирклиан, неинки багъри мектебдиъ, хъа гьацира райондиъ, республикайиъ гъягъру жюрбежюр серенжемариъ жанлуди иштирак шули гъахьну. Мисалназ, Дагъустандин педагогвалин кадрйирин пишекарвалин дережа за апIру институтдиз гьаъну, дугъу 1987-пи йислан 1989-пи йисаз Дербент шагьриъ мялимарин пишекарвалин дережа за апIбан курсариъ лекцйир гъурхну, «Табасарандин мялим – 2005» конкурс-диъ гъалиб гъахьну. 2008-пи йисан «Ужурсир мялим» конкурсдиъ гъазанмиш гъапIу хъуркьувалариз лигну, Урусатдин Федерацияйин образование-йин Министерствойин грамотайиз лайикьлу гъахьну. Ерли методобъединениейин ляхниъра дугъу заан активвал улупуру.
Аьбдусалам Асланов 2010-пи йислан мина Урусатдин Федерацияйин журналистарин Союздин член ву.
Думу гьацира СССР-ин образованиейин Министерствойин, мярифатнан, заан мектебдин ва илимдин тешкилатарин ишчйирин профсоюздин ЦК-йин гьюрматнан грамотайин сагьиб (1982-пи йис), РФ-дин ужударсдар мялимарин 2008-пи йисандин конкурсдин гъалибчи, Урусатдин Федерацияйин уьмуми образованиейин лайикьлу гъуллугъчи, Президентдин грантдин сагьиб (2008-пи йис), заан категорияйин мялим ву.
Аьбдусалам Мягьямедович Дагъустандин Правительствойин, жигьиларин ляхнариз лигру Министерствойин, респуб-ликайин ТОКС-дин, республикайин ветеранарин союздин, Табасаран райондин администрацияйин, образованиейин управлениейин ва саб кьадар жара тешкилатарин гьюрматнан грамотйириз лайикьлу духьна.
2013-пи йислан мина Аьбдусалам Асланов Табасаран райондин ТОКС-дин штабдин начальникди лихура, ва думу ляхниъра дугъу аьхю хъуркьувалар гъазанмиш дапIна. Тажрубалу мялимди учв жямяаьтлугъ ляхнариъра лайикьлуди улупура. Йиз фикриан, му кас яшамиш гъахьи йисариинди ваъ (13-пи мартдиъ дугъан 70-йис тамам шула), хъа гележегдиз дибиснайи терефниинди ва апIурайи ляхнариинди девлетлу ву.
Аьбдусалам Асланов албагу хизандин эйсира ву, дугъаз юкьур велед а. Дурар вари адашдин рякъюъди гъушну, ва варидиз заан образованиера а. Аьбдусалам Аслановдин веледар вари гьамусяаьт чпин хизанарихъди яшамиш шула.
Аьбдусалам Асланов табасаран чIалниинди газатар, журналар урхрудариз ужуди аьгъя. Дугъан макьалйир, шиърар «Табасарандин нурар», «Табасарандин сес» газатариъ, «Ппази» журналиъ кми-кмиди чап апIури шулу.
Шиърар, макьалйир дикIуз Аьбдусалам Асланов Дербентдин педучилищейиъ урхури имиди хъюгъну. Дугъан яратмиш апIбариъ насигьят тувбан, эдеблувалин, ватанпервервалин темйири аьхю йишв бисура. Дугъаз чан хусуси хатI а, ва уьмриъ алахьру дюшюшар, чан улариз рябкъюрайиб мяна жигьатнаан дерин апIури, дугъу цIийи эсерар уьмриз хура.
Аьхю шулайи наслиз дерин аьгъювалар ва ужуб тербия тувбан бадали, фидакарвалиинди зегьмет зигурайи Аьбдусалам Мягьямедовичдиз гележегдиъра чан ляхниъ заан хъуркьувалар, мюгькам сагъ’вал, ярхи уьмур, хизандин шадвал, яратмиш’валиъ ягъли кIакIар мютIюгъ апIувал ккун ва гьаддихъди сабси думу 70 йисандин юбиле-йихъдира тебрик апIурхьа. Гъит му касдин вари ниятар, кьастар кIулиз удучIври!
