«Табасарандин нурар» газатдин ккудубшу 11-пи нумрайиъ «100 мектеб» проектдиъ иштирак хьуз гьязур шула» кIуру макьалайиъ учу Дербент шагьриан ва Дербент, Хив районариан мектебар му проектдиъ иштирак хьуз гьязур шулайиваликан мялуматар тувнийча. Макьала давам апIури, Дагъ. Огни шагьриан ва Табасаран райондиан «100 мектеб» проектдин конкурсдиъ иштирак хьуз швнуб ва фуну мектебар гьязур шулаш, хабар туврача.

 

Дагъ. Огни шагьрин образованиейин управлениейин начальник Максим Аьлихановди туву мялуматариинди, проектдин конкурсдиъ иштирак’вал апIуз шагьрин 2-пи, 3-пи, 5-пи ва 7-пи нумрайин мектебар гьязур шула. Мектебарин администрацйири меценатарра агура.

Табасаран райондин образованиейин управлениейин начальник Аьбдусалам Гьясановдин къайд гъапIганси, улихьмиди вуйи мялуматариинди, цци райондиан «100 мектеб» проектдин конкурсдиъ 15 мектеб иштирак хьуз кка: Курккарин, Кьюрккарин, Кюргъярин, Мягьрягъярин, ЦIанкарин, Хили-Пенжигьарин, Зил’арин, Гум’арин, Гьесхъарин, ХустIларин, Гурхнаарин, Ягъдигъарин 1-пи нумрайин, Улзгъарин, Аркарин ва Рушвларин мектебар. Думу мектебарин администрацйири гьамусяаьт документар гьязур апIуз хъюгъна.

Къайд дапIну ккунду, сачра республикайин вари районарин арайиъ кIули гъубшу проектдиъ варитIан гизаф кьадар мектебар (12 мектеб) Табасаран райондиан иштирак гъахьну.