Мартдин 18-пи йигъан Мягьячгъалайиъ, Расул Гьямзатовдин ччвурнахъ хъайи Милли библиотекайиъ, «Дагъустандин писателар ва 1941-1945-пи йисарин Ватандин Аьхю дяви» ччвур тувну, Ватандин Аьхю дявдиъ гъалибвал гъадабгъну 75 йис хьпаз ва Дагъустандин халкьдин шаир МутIалиб Митаров бабкан гъахьихъан мина 100 йис тамам хьпаз бахш дапIнайи республикайин илимдинна практикайин конференция кIули гъубшну.
Конференция РД-йин образованиейин ва илимдин Министерствойи, Аь.Аь.Тахо-Годийин чIвурнахъ хъайи Дагъустандин педагогвалин илим ахтармиш апIбан институтди, Дагъустандин писателарин Союзди тешкил дапIнайиб вуйи.
Серенжем ачмиш гъапIу педагогвалин илмарин доктор Меседу Шурпаевайи Дагъустандин писателар ва шаирар Ватандин Аьхю дявдиъ иштирак хьуваликан, дурарин эсерарин ватанпервервалин мянайикан, дявдин иштиракчйир гъахьи шаирарин ва писателарин эсерар дагъустан мектебариъ аьгъю апIбан месэлйирикан гъапнийи. «Дявдиъ иштирак гъахьи писателари ва шаирари ватан бадали гъубху женгнакан наслариз гьякьлу мялуматар гъитну. АбутIалиб Гъафуровди, Эфенди Капиевди, МутIалиб Митаровди, Ражаб Дин-Мягьямаевди ва хъана жарадари дявдикан бикIувал чпин буржи вуди гьисаб апIури гъахьну. Дявдиан кьяляхъ дарфи шаирарин ччвурарра, гьунарарра баркаллу агьларин кIваъ гьаргандиз гъузна» – къайд гъапIнийи Меседу Шурпаевайи.
Конференцияйиъ Ватан-дин Аьхю дявдин иштиракчи М.Митаровдин уьмрикан, кьисматнакан ва яратмиш апIбарикан доклад хьади филологияйин илмарин кандидат Низами Сафарялиев удучIвну гъулхнийи.
Дагъустандин дявдин йисарин писателарин яратмишарин анализ гъапIу филологияйин илмарин доктор Мягьямед Къурбановди гьамци гъапнийи: «МутIалиб Митаровдикан ухьу улхруган, йиз кIулиз 18 поэма, 7 баллада ва варжариинди шиърар айи 41 китаб гъюру. Му, табасаран литературайикси, вари дагъус-тан литературайикра кивнайи аьхю пай ву. МутIалиб Митаровдин эсерар дугъан аьхюну гъардаш Багьаудин Митаровдин эсерарси машгьур гъахьну. Женгар яваш духьнайи вахтна, писателари ва шаирари мичIли ва ламун сенграриъ чпин блокнотариъ дявдин гьяракатарикан чпин фикрар дикIури гъахьну».
Серенжемдиъ гьацира МутIалиб Митаров чпиз лап багахьди таниш вуйи Шагьвелед Шагьмарданов, Мягьямед Гьясанов ва Багъир Ражабов удучIвну гъулхнийи. Дурари Митаровдин эсерарин мяналуваликан, уьмрикан ва дугъан гьунарнакан аьшкьлуди ктибтнийи.
Конференцияйин аьхириъ МутIалиб Митаровдин ччвур тувнайи Хив райондин Сюгют гъулан кьялан мектебдин мялим, директорин заместитель И.Р.Аьшурбеговайи М.Митаров бабкан гъахьихъан мина 100 йис тамам хьпаз тялукь вуди чпин мектебдиъ гъабхурайи ляхникан ктибтнийи. Думу удучIвну улхбан кьяляхъ, мектебдин 11-пи классдиъ урхурайи А.Н.Къурбанисмяиловайи ва 7-пи классдиъ урхурайи Н.Р.Аьгьмедовайи табасаран ва урус чIалариинди МутIалиб Митаровдин шиърар гъурхнийи.
