17-пи мартдиъ Табасаран райондин культурайин Хулаъ ихь сифте кIуларихъди аьлакьалу конкурс кIули гъубшну. Душваъ Кюрягъ гъулан мектебдиъ урхурайидарин «Игитар» ва Куркакк гъулан мектебдиъ урхурайидарин «Аьдатарин гъала» кIуру командйир иштирак гъахьнийи.

 

 

Му конкурс райондин бицIидарин яратмиш’валин Хулу (ДДТ-йи) гьар йисан тешкил апIурайиб ву. Конкурс 7 табшуругъдикан ибарат вуйи: гьарсаб командайин салам тувувал; чиб-чпихъ суалар хъирчбан конкурс; кюгьне ялхъван апIувал; табасаран халкьдин аьдатарикан саб улупувал; музыкайин конкурс, кюгьне мяъли апIувал; кюгьне палтар улупувал; кюгьне хурагар гьязур апIувал.

Иштиракчйири хурагарин конкурсдиз саб хайлин милли хурагарра духнайи: варжйирин хинкIар, афрар, чIиргъин, укIан цIикбар, давгъа, пIенкI, галаригъ гъяпIру варжйирин аш, гъурхьу харар, удрин шурпа, чIихир, тIубан хинкIар, дирнин уьл, абцIу пеъ, аварши, ургуб жарнан цIикаб, дангу, берччем, рудрин аш, гъванжрар, нитIиф, хюйин шурпа, тIанжир, гъурхьу муртйир.

Кюгьне палатдин конкурсдизра улихь заманйирин саб хайлин палтар духнайи: гумихьна (гюмихьна) алабхьру палат, хулаъ алабхьру палат, марччлихънин ва габнин палтар, сумчриз гъягъруган алабхьру палат, швушван палат ва гьацдар жарадар.

«Кюгьне аьдатар» кIуру конкурсдиъ кьюби командйирира эбелцнан аьдатар улупнийи: муртйир йивувал, уф-цIа апIувал, ергну цIиллан ултIурччвувал, аьхю бабарихьна гъягъюри, чпиз мурт-йир ва жара шей’ар уч апIувал.

«Кюгьне мяъли» кIуру конкурсдиъ, хпари «Яр, халай» мяълийихъди хьайир йивури, чухрайихъ мурсул апIури ва жара ляхнар милаъ айиганси улупнийи.
Конкурсдиъ Кюргъярин мектебдиъ урхурайидарин «Игитар» кIуру команда гъалиб гъабхьну.